សន្តិសុខសង្គម

ក្រឡាប់ទូក.ដ ស្លាប់អ្នកបូជាសពម្នាក់ ខណៈខ្យល់បក់ខ្លាំងពេលកំពុងឆ្លង

បានផុស

៣ years មុន

នៅ

ថ្ងៃសៅរ៍ ២៧ វិច្ឆិកា ២០២១

ដោយ

បុរសជាម្ចាស់រថយន្ដដឹកសម្ភារៈបូជាសព (មេន) បានលង់ទឹកស្លាប់ ខណៈបើករថយន្ដឡើងទូក.ដ ដើម្បីឆ្លងទៅត្រើយម្ខាង តែត្រូវខ្យល់បក់បោកបណ្ដាលឲ្យក្រឡាប់ទូក.ដ ពេលឆ្លងជិតដល់ត្រើយ។

ករណីនេះបានកើតឡើងកាលពីវេលាម៉ោង០៥និង៣០នាទីព្រឹក ថ្ងៃទី២៦ ខែវិច្ឆិកា ឆ្នាំ២០២១ នៅចំណុចស្ទឹងក្រោយវត្តទួលស្លែង ស្ថិតនៅក្នុងភូមិទួលស្លែង ឃុំលើកដែក ស្រុកកោះធំ ខេត្តកណ្ដាល។

ជនរងគ្រោះមានឈ្មោះ គីម ស៊ឹង ភេទប្រុស អាយុ៣២ឆ្នាំ ជនជាតិខ្មែរ មានទីលំនៅភូមិព្រែកផ្អាវ ឃុំកំពង់កុង ស្រុកកោះធំ ខេត្តកណ្ដាល មុខរបរសង់មេនបូជាសព ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា នៅវេលាម៉ោងកើតហេតុ មានរថយន្តម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 2X-3530 ដឹកសម្ភារៈសម្រាប់បូជាសព(មេន) បើកឡើងទូក.ដ ដើម្បីឆ្លងទៅត្រើយម្ខាង(ពីភូមិត្រឡោកបែក ទៅភូមិទួលស្លែង) ពេលទូក.ដ ឆ្លងជិតដល់ត្រើយ ស្រាប់តែមានខ្យល់បក់ខ្លាំង ធ្វើឲ្យទូក.ដរេចង្កូតទៅទិសខាងលិច ហើយក្រឡាប់លិច បណ្តាលឲ្យបុរសជាអ្នកបើកបររថយន្តដឹកមេននោះ លង់ទឹកស្លាប់តែម្តង។

តាមប្រភពពីកន្លែងកើតហេតុបានឲ្យដឹងថា ករណីនេះ ដោយសារជនរងគ្រោះធ្វេសប្រហែស ខ្វះការប្រុងប្រយ័ត្ន មិនស្ដាប់តាមការណែនាំរបស់អ្នកបើកទូក.ដ ឲ្យរើសម្ភារៈចុះខ្លះ ព្រោះចម្លងខ្លាចក្រែងមានឧបសគ្គ តែជនរងគ្រោះមិនស្ដាប់ ហើយចចេសមិនធ្វើតាម ដោយអះអាងថា ខ្លួនប្រញាប់ទៅរៀបចំសង់មេនបូជាសពឲ្យគេ ហើយបង្ខំឲ្យអ្នកបើកទូក.ដ ចេញដំណើរទើបគ្រោះថ្នាក់បែបនេះ។

ក្រោយកើតហេតុ កម្លាំងសមត្ថកិច្ចបានចុះទៅដល់កន្លែងកើតហេតុ ដើម្បីធ្វើការស្រង់យកមធ្យោបាយ និងសពជនរងគ្រោះឡើងគោក ដោយប្រើពេលអស់រយៈពេល៨ម៉ោង គិតត្រឹម៧ព្រឹក រហូតដល់១៤និង០០នាទីរសៀលថ្ងៃដដែល ទើបរួចរាល់។

សមត្ថកិច្ចបញ្ជាក់ថា ករណីនេះប្រពន្ធសពជនរងគ្រោះមិនប្ដឹងផ្ដល់ទាមទារលើភាគីណាទេ ដោយសារប្ដីខ្លួនធ្វេសប្រហែសដោយខ្លួនឯង។ ណាមួយទូកដជារបស់វត្ត ចម្លងមិនបង់ប្រាក់ គឺសម្រាប់ចម្លងប្រជាពលរដ្ឋទៅមកតែប៉ុណ្ណោះ៕

Related Topics:ខេត្តកណ្ដាល