ឡោមព័ទ្ធចាប់ក្រុមចោរគាស់ទ្វារចេតិយក្នុងវត្តបានម្នាក់ និងម្នាក់ទៀតកំពុងគេចខ្លួន

ក្រុមចោរ​ពី​នាក់បានធ្វើ​សកម្មភាពចូល​គាស់​ទ្វារ​ចេតិយក្នុង​វត្ត ត្រូវ​សមត្ថកិច្ច​ឡោមព័ទ្ធចាប់បាន​ម្នាក់ និង​ម្នាក់ទៀត​រត់គេចខ្លួន ។

ការឃាត់ខ្លួននេះ​បានកើត​ឡើង​កាលពី​ថ្ងៃទី​០១ ខែធ្នូ ឆ្នាំ​២០២១ វេលាម៉ោង៩និង​៣០​នាទី នៅ​ចំណុច​វត្ត ព្រៃ​រោង ភូមិត្បូង​ក្តី ឃុំបារគូ ស្រុកកណ្ដាលស្ទឹង ខេត្តកណ្ដាល ។

នគរបាល​បានអោយដឹងថា ជនរងគ្រោះ​មានឈ្មោះ វ៉ាន់ ថន ភេទប្រុស អាយុ៧០​ឆ្នាំ មានទីលំនៅភូមិ​ត្រពាំង​ចក ឃុំថ្មី ស្រុកកណ្តាលស្ទឹង ខេត្តកណ្ដាល មុខរបរ ព្រះសង្ឃ។ ចំណែកជនសង្ស័យ២នាក់ ទី​១​ឈ្មោះ ម៉ៅ ព្រឹក ភេទ​ប្រុស អាយុ២៤ឆ្នាំ មាន​ទីលំនៅផ្ទះជួល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មុខរបរមិនពិតប្រាកដ។ ទី​២​ឈ្មោះ អូន មិនស្គាល់អត្តសញ្ញាណ (​គេចខ្លួន ) ។

នគរបាល​បាន​អោយដឹងទៀតថា នៅ​ថ្ងៃទី១ ខែធ្នូ ឆ្នាំ២០២១ វេលាម៉ោង៧​និង​៣០​នាទី ជនសង្ស័យខាង លើបានបើ​កម៉ូតូសណ្តោងរ៉ឺម៉កមួយគ្រឿងចេញពី​ផ្ទះជួល​ស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ តាម​បណ្តោយ​ផ្លូវជាតិ៣ សំដៅ​មក​កន្លែងកើ​តហេតុ ហើ​យ​បាន​បើ​ក​ម៉ូតូសណ្តោងរ៉ឺម៉ក ចូលទៅក្នុងវត្តព្រៃ​រោង ពេលទៅដល់ចំណុចកើ​តហេតុ ជនសង្ស័យទាំងពីរបានធ្វើសកម្មភាពលួចគាស់​ទ្វារ ចេតិយបានចំនួន៣ផ្ទាំង រួចលើ​ក​ដាក់រ៉ឺម៉កបើ​ក​ចេញ​តាម​ក្រោយវត្ត ដើ​ម្បីយកទ្វារចេតិយទៅ​លក់​នៅ​ឃ្លាំង អេតចាយ មួយកន្លែងស្ថិតនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ដោយបានតម្លៃ ៤០០.០០០​រៀល ។

លុះ​ព្រឹកថ្ងៃទី២ ខែ ឆ្នាំ ដដែល ជនសង្ស័យទាំង​០២​នាក់​ខាង​លើ បានបើ​កម៉ូតូសណ្តោងរ៉ឺម៉កចូលក្នុងវត្ត​ម្តង ទៀត បម្រុងធ្វើសកម្មភាពលួចគាស់ទ្វារចេតិយ តែ​ត្រូវព្រះសង្ឃក្នុងវត្ត​ឃើ​ញ ហើយរាយការណ៍ជូន សមត្ថកិច្ច។ ភ្លាមនោះជនសង្ស័យទាំងពីរនាក់បានបើកម៉ូតូសណ្តោងរ៉ឺម៉ករត់គេ​ខ្លួនតែ​ត្រូវកម្លាំងប៉ុស្តិ៍ នគរបាលរដ្ឋបាលឃុំបារគូ និងកម្លាំងប៉ុស្តិ៍នគរបាលរដ្ឋបាល ឃុំអន្លង់រមៀតឃាត់ខ្លួនជនសង្ស័យបានម្នាក់ បញ្ជូនមកកាន់អធិការដ្ឋា​ននគរបាលស្រុក​កណ្តាលស្ទឹង ដើ​ម្បីកសាងសំនុំរឿង​តាមនីតិវិធីច្បាប់៕

អត្ថបទ៖ ឆៃ យ៉ា​