សន្តិសុខសង្គម

ពលរដ្ឋភូមិកោះក្របី ស្នើអាជ្ញាធរឱ្យអន្តរាគមន៍ ករណីក្រុមហ៊ុនមួយ ធ្វើផ្លូវបិទប្រឡាយទឹកលិចចម្ការស្ពៃ

បានផុស

៣ years មុន

នៅ

ថ្ងៃចន្ទ ៦ ធ្នូ ២០២១

ដោយ

ប្រជាកសិករដាំស្ពៃ រស់នៅ ភូមិកោះក្របី សង្កាត់ផ្សារឆ្នាំង ក្រុងកំពង់ឆ្នាំងមានការព្រួយបារម្ភពីចម្ការស្ពៃរបស់ពួកគាត់ត្រូវបានលិចទឹក ដោយសារក្រុមហ៊ុនមួយចាក់ដីធ្វើផ្លូវបិទប្រឡាយបង្ហូរទឹក។

លោក ឈឿង ហួរ អាយុ ៥៣ ឆ្នាំ បានប្រាប់ថា ជារៀងរាល់ឆ្នាំពួកគាត់បានដាំស្ពៃនៅទីនេះដើម្បីចិញ្ចឹមជីវិត ហើយឆ្នាំនេះពួកគាត់បានជួលដីគេដាំស្ពៃដូចសព្វដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែនៅយប់ថ្ងៃទី ៥ ខែធ្នូ មានក្រុមហ៊ុនមួយ បានចាក់ដីធ្វើផ្លូវបិទប្រឡាយដែលទឹកហូរចេញ បណ្តាលឲ្យជន់លិចចម្ការស្ពៃរបស់ពួកគាត់ខូចខាតតែម្តង។

នៅក្នុង រយៈពេលតែមួយយប់ប៉ុណ្ណោះ ស្ពៃ របស់ពួកគាត់បានលិចលង់អស់ជាច្រើនរង។ ពួកគាត់សំណូមពរដល់អាជ្ញាធរ ខេត្ត និងក្រុងសូមមេត្តាជួយអន្តរាគមន៍ឲ្យក្រុមហ៊ុនខាងលើ ជួយដាក់ប្រព័ន្ធលូរំដោះទឹកចេញ ដើម្បីឲ្យពួកគាត់អាចដាំស្ពៃបានដូចសព្វដងផងចុះ។

ជុំវិញការធ្វើផ្លូវបិទប្រឡាយរំដោះទឹកនេះលោក បេ សារុំ អភិបាលរងក្រុងកំពង់ឆ្នាំង នៅព្រឹកថ្ងៃទី ០៦ ខែធ្នូនេះបានបញ្ជាក់ថា អាជ្ញាធរខេត្តបានឲ្យក្រុមហ៊ុនមួយធ្វើផ្លូវបេតុង ប្រវែង ៣គីឡូម៉ែត្រ ចូលទៅដីដែលត្រៀមវិនិយោគធ្វើបុរីមួយកន្លែងនៅក្នុងភូមិកោះក្របី ដោយអាជ្ញាធរខេត្តបានអនុញ្ញាតច្បាប់ឱ្យគេរួចហើយ។

ដោយឡែក លោក ហ៊ីង ភ័ព្វមីនា អភិបាលរង ក្រុងកំពង់ឆ្នាំង បានបញ្ជាក់ថា លោកមិនបានដឹងរឿងហ្នឹងទេ ប៉ុន្តែលោកនឹងចុះពិនិត្យ មើលនិងអន្តរាគមន៍ក្រោយពេលទទួលដំណឹងនេះពីក្រុមអ្នកសារព័ត៌មាន៕