ពលរដ្ឋ ស្នើអាជ្ញាធរជួយជួសជុល គំរបលូខូចមួយកន្លែង នៅមុខវិទ្យាល័យឫស្សីកែវ

គំរបលូមួយកន្លែង នៅចំណុចខាងមុខវិទ្យាល័យឫស្សីកែវ កំពុងមានការខូចខាតចេញសរសៃដែក ដោយមិនទាន់ដឹងមូលហេតុ។

ប្រជាពលរដ្ឋ បានប្រាប់ឲ្យដឹងថា ផ្លូវបេតុង ១ខ្សែ នៅភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ដែលប្រជាពលរដ្ឋ ក៏ដូចជាសិស្សានុ-សិស្សធ្វើដំណើរទៅមករាល់ថ្ងៃនោះ ឥឡូវមានគំរបលូមួយកន្លែង នៅចំណុចខាងមុខវិទ្យាល័យឫស្សីកែវតែម្តង កំពុងមានការខូចខាតចេញសរសៃដែក  ដោយមើលទៅខាងក្នុងមានទំហំធំ និងជ្រៅទៀតផង។

ប្រជាពលរដ្ឋ បានប្រាប់បន្តថា លូដែលខូចគំរបនោះ ទើបតែមួយថ្ងៃ ឬពីរថ្ងៃប៉ុណ្ណោះ ដោយមិនដឹងថា ខូចខាតដោយ សារអ្វី ឬក៏អ្នកណាធ្វើឲ្យខូចនោះដែរ ដែលមានចេញសរសៃដែកទៀតផង។ ប្រសិនបើមានកង់ ឬម៉ូតូធ្វើដំណើរទៅមក មិនដឹងថា អាចនឹងបង្កគ្រោះថ្នាក់ ឬយ៉ាងណានោះទេ។

ដោយបញ្ហានេះ ប្រជាពលរដ្ឋ បានសំណូមពរអាជ្ញាធរសង្កាត់ ឬអាជ្ញាធរខណ្ឌឫស្សីកែវ ជាពិសេសស្ថាប័ន និងជំនាញពាក់ព័ន្ធ មេត្តាជួយដោះស្រាយជួសជុល ឲ្យបានល្អស្អាតឡើងវិញផង ជៀសវាងបង្កគ្រោះថ្នាក់ទៅដល់ប្រជាពលរដ្ឋ ក៏ដូចជាសិស្សានុ-សិស្ស ដែលកំពុងធ្វើដំណើរទៅមករាល់ថ្ងៃ៕

អត្ថបទ៖ រ៉ាវុទ្ធ