សន្តិសុខសង្គម

ខឹងម្ដាយស្ដីបន្ទោស ទាញដែកវាយម្ដាយរងរបួសធ្ងន់ និងដុតផ្ទះឆេះខ្ទេច

បានផុស

៣ years មុន

នៅ

ថ្ងៃចន្ទ ២០ ធ្នូ ២០២១

ដោយ

បុរសម្នាក់ត្រូវបានកម្លាំងសមត្ថកិច្ចឃាត់ខ្លួនបញ្ជូនចាត់ការតាមផ្លូវច្បាប់ បន្ទាប់ពីប្រើអំពើហិង្សាលើម្ដាយចុងបណ្ដាលឲ្យរងរបួសធ្ងន់ និងដុតបំផ្លាញផ្ទះខ្លួនឯងឆេះខ្ទេច ដោយសារខឹងម្ដាយចុងស្ដីបន្ទោស។

ករណីហិង្សានិងដុតបំផ្លាញផ្ទះនេះ បានកើតឡើងកាលពីថ្ងៃទី១៧ ខែធ្នូ ឆ្នាំ២០២១ វេលាម៉ោង២១និង១០នាទី នៅចំណុចវត្តភ្នំស្លឹក ស្ថិតក្នុងភូមិបឹងអំពិល ឃុំស្ដៅ ស្រុករតនមណ្ឌល ខេត្តបាត់ដំបង ។

លោកវរសេនីយ៍ឯក សន និល អធិការនគរបាលស្រុករតនមណ្ឌល បានអោយដឹងថា ជនល្មើសឈ្មោះ ណាត មករា ភេទប្រុស អាយុ២៥ឆ្នាំ រស់នៅចំណុចកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពបានបន្តថា ជនល្មើសបានធ្វើសកម្មភាពយកដែកប្រវែង១ម៉ែត្រ វាយទៅលើម្ដាយចុងរបស់ខ្លួនឈ្មោះ សុខ យីម អាយុ៥៨ឆ្នាំ បណ្ដាលអោយបាក់ដៃខាងស្ដាំ របួសខ្នងជើងខាងស្ដាំ និងបែកក្បាលផ្នែកខាងស្ដាំ (រងរបួសធ្ងន់បញ្ជូនទៅមន្ទីរពេទ្យខេត្ត)។

ក្រោយធ្វើសកម្មភាពរួច ជនសង្ស័យបានដុតបំផ្លិចបំផ្លាញលំនៅឋានរបស់ខ្លួនមានទំហំ ៣ម៉ែត្រ x ៤ម៉ែត្រ ធ្វើអំពីឈើប្រក់ស័ង្កសីជញ្ជាំងស័ង្កសី ព្រមទាំងឆេះម៉ូតូចាស់ចំនួន០២គ្រឿង ខូចខាតទាំងបស្រុង ។

បន្ទាប់ពីបង្ករហេតុ កម្លាំងសមត្ថកិច្ចបានឃាត់ខ្លួនជនសង្ស័យយកមកកាន់អធិការដ្ឋាននគរបាលស្រុករតនមណ្ឌល និងរៀបចំសំណុំរឿង ដើម្បីបញ្ជូនទៅការិយាល័យជំនាញខេត្ត ដើម្បីអនុវត្តបន្តតាមនីតិវិធី ៕

Related Topics:ករណីហិង្សា