ផ្តន្ទាទោស​បុរសម្នាក់​ដាក់ពន្ធនាគារ​ ២០ឆ្នាំ​ជួញថ្នាំញៀន​ជាង១គីឡូ

ជនមុខការក្នុងជំនួញគ្រឿងញៀនម្នាក់ នៅព្រឹកថ្ងៃទី ២២ ខែធ្នូ ឆ្នាំ២០២១ ត្រូវបានចៅក្រមជំនុំជម្រះសាលាដំបូងរាជធានីភ្នំពេញ លោក អ៉ឹម វណ្ណៈ ប្រធានក្រុមប្រឹក្សា និងលោក សេង ហៀង ជាតំណាងអយ្យការ បានសម្រេចប្រកាសសាលក្រមផ្តន្ទាទោសដាក់ពន្ធនាគារកំណត់ចំនួន ២០ឆ្នាំ និងពិន័យ ៤០ លានរៀល បង់ចូលថវិការដ្ឋក្រោមការចោទប្រកាន់ពីបទ ជួញដូរដោយខុសច្បាប់នូវសារធាតុញៀន។

បុរសជនជាប់ចោទឈ្មោះ ជា ថៃតាំ អាយុ ៣០ឆ្នាំ ជនជាតិខ្មែរ។ សមត្ថកិច្ច នៃមន្ទីរប្រឆាំងបទល្មើសគ្រឿងញៀន បានបង្ក្រាបករណីជួញដូរគ្រឿងញៀន ជាង១គីឡូនេះគឺ អនុវត្តតាមបញ្ជារបស់នាយនគរបាលជាតិ។

កាលពីថ្ងៃទី ០៧ ខែមិថុនា ឆ្នាំ២០២១ វេលាម៉ោង ១៣៖ ៣០នាទី កម្លាំងជំនាញ(ក៥)នៃមន្ទីរប្រឆាំងបទល្មើសគ្រឿង​ញៀន ដឹកនាំដោយលោកឧត្តមសេនីយ៍ទោ សាន សុទ្ធី នាយករងមន្ទីរ និងលោកវរ:សេនីយ៍ឯក ជាវ វណ្ណា នាយការិយាល័យ(ក៥) ព្រមទាំងមានកាសម្របសម្រួលពីលោក ហេង ផេង ព្រះរាជអាជ្ញារងអមសាលាដំបូង រាជធានីភ្នំ បានបើកការស្រាវជ្រាវ បង្រ្កាបករណីជួញដូរគ្រឿងញៀន នៅចំណុច គល់ស្ពានស្ទឹងមានជ័យ ស្ថិតក្នុង សង្កាត់បឹងសាឡាង ខណ្ឌទួលគោក រាជធានីភ្នំពេញ។

លទ្ធផលនៃការបង្ក្រាបចាប់ខ្លួនជនសង្ស័យ០១នាក់ឈ្មោះ ជា ថៃតាំ ដកហូតវត្ថុតាងចាប់យកគ្រឿងញៀនប្រភេទមេតំហ្វេតាមីន(ICE)១កញ្ចប់ធំ ៣កញ្ចប់តូច ស្មើទម្ងន់ ១២៩៤,៣៩ ក្រាម ហើយត្រូវបានបញ្ជូនមកតុលាការឃុំខ្លួនរហូតដល់ថ្ងៃកាត់ទោសនេះ៕

អត្ថបទ៖ មករា