សន្តិសុខសង្គម

UPDATE៖ ផ្ទុះហ្គាសនៅស្ថានីយជិតសួនច្បារដំរីស សមត្ថកិច្ចថា ជាការធ្វេសប្រហែសរបស់បុគ្គលិកលក់ ដូរប្រេងឥន្ធនៈ

បានផុស

៣ years មុន

នៅ

ថ្ងៃសុក្រ ៣១ ធ្នូ ២០២១

ដោយ

ករណីផ្ទុះហ្គាសចំនួន ៦៨ ធុង ដោយសារឆ្លងចរន្តអគ្គិសនី នៅក្នុងដេបូស្ថានីយលក់ប្រេងឥន្ធនៈតេលាមួយកន្លែង នៅជិតសូនច្បារដំរីស ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង កាលពីព្រឹកថ្ងៃទីខែ ២៩ ខែធ្នូ សមត្ថកិច្ចបញ្ជាក់ថា គឺជាការធ្វេស ប្រហែសរបស់បុគ្គលិកលក់ដូរប្រេងឥន្ធនៈ សំណាងហើយដែលគ្មានគ្រោះថ្នាក់ដល់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ត្រី លុយឌីណា ស្នងការរងនគរបាលខេត្តនៅល្ងាចថ្ងៃទី ៣០ ខែធ្នូនេះ បានឲ្យដឹងថា តាមការស្រាវជ្រាវនិងត្រួតពិនិត្យរបស់មន្ត្រីជំនាញបានឲ្យដឹងថា មុនពេលកើតហេតុមានបុគ្គលិកលក់ដូរម្នាក់កំពុងប្រើម៉ូទ័រអគ្គិសនីបូមបញ្ចូលពីធុងធំមកធុងតូច ខណៈកំពុងបញ្ចូលនេះ ពេលមានអតិថិជនចាក់សាំងរថយន្តផ្សេង ១ គ្រឿងទៀតនោះបុគ្គលិករូបនេះ ក៏បានទុកម៉ូទ័រដែលកំពុងបញ្ចូលហ្គាសពីធុងចូលធុងតូចនៅចោល ដោយរវល់ទៅចាក់សាំងឲ្យរថយន្តមួយគ្រឿងទៀត។ ខណៈនោះធុងហ្គាសតូចបានចូលពេញហួសកំណត់ធ្វើឲ្យធំនោះផ្ទុះតែម្ដងហើយបានរាលដាលឆេះទៅធុងហ្គាស់តូចធំដទៃទៀតចំនួន ៦៨ ធុង ផ្ទុះឆេះជាបន្តបន្ទាប់ទោះបីស្ថានីយប្រេងឥន្ធនៈនេះមានបំពង់ពន្លត់អគ្គិភ័យហើយក៏ដោយ ក៏បុគ្គលិកនោះគ្មានស្មារតីចូលពន្លត់ធុងហ្គាស ដែលកំពុងផ្ទុះឆេះសន្ធោសន្ធៅនោះបានឡើយ ។

លោកស្នងការរងបានបន្តថា នៅក្នុងករណីខាងលើនេះ អគ្គិភ័យបានឆាប់ឆេះហ្គាសធំតូចចំនួន ៦៨ ធុង ក្នុងនោះស៊ីទែនផ្ទុកប្រេងម៉ាស៊ូតចំណុះ ១២០០០ លីត្រក៏ត្រូវបានឆាប់ឆេះអស់ទាំងស្រុងផងដែរ ។ ប៉ុន្តែពិតជាសំណាងល្អដែរ ស៊ីទែនប្រេងម៉ាស៊ូតនៅជិតនោះ ក៏មានស៊ីទែនប្រេងសាំងនិងហ្គាស មានចំណុះ ១២០០០វីតដូចគ្នា ២ស៊ីទែនទៀតដែលមិនបានឆ្លងរាលដាលផ្ទុះឆេះ។ ប្រសិនបើឆ្លងឆេះស៊ីទែនទាំង២នេះទៀត ការអន្តរាគមន៍សង្គ្រោះករណី នេះរបស់នគរបាលជំនាញ ពិតជាលំបាកយ៉ាងខ្លាំងជាមិនខាន ។

ដោយឡែកគិតមកដល់ល្ងាចថ្ងៃទី ៣០ ខែធ្នូនេះ ទំហំការខូចខាតក្នុង ករណីគ្រោះអគ្គិភ័យខាងលើនេះ សមត្ថកិច្ចមិនទាន់បានបូកសរុបជាផ្លូវការនៅឡើយទេ ព្រោះតែម្ចាស់ស្ថានីយប្រេងឥន្ធនៈជាប់មានការងារនៅខេត្តព្រះសីហនុនៅឡើយ។ ប៉ុន្តែតាមការត្រួតពិនិត្យជាក់ស្ដែងរបស់សមត្ថកិច្ចថា ការខូចខាត គឺឆេះអស់ហ្គាសតូចធំចំនួន ៦៨ ធុង និងឆេះស៊ីទែនប្រេងម៉ាស៊ូត ១ស៊ីទែនចំណុះ ១២ ០០០លីត្រ ក្រៅពីនេះក៏នៅមានការឆេះខូចខាត ប្រាក់ដុល្លារនិងប្រាក់រៀល មួយចំនួនធំទៀត ដែលមិនទាន់ដឹងពីចំនួនសរុបនៅឡើយ ក្រោយពីសមត្ថកិច្ចបានជួយអន្តរាគមន៍បាញ់ពន្លត់អស់ទឹក ១៣ រថយន្ត ។

ទោះបីយ៉ាងណា សមត្ថកិច្ចក៏នៅបានសម្ដែងការព្រួយបារម្ភថា សព្វថ្ងៃនេះកន្លែងបូមទឹកចល័តក្នុងក្រុមកំពង់ឆ្នាំងសម្រាប់រថយន្តពន្លត់អគ្គិភ័យរបស់ស្នងការដ្ឋាននគរបាលខេត្ត មានចំនួន ៧ កន្លែង ។ ប៉ុន្តែក្បាលទុយយោសម្រាប់បូមទឹកបញ្ចូលក្នុងរថយន្តពន្លត់អគ្គិភ័យនោះមានទំហំ ៤ ហ៊ុនកន្លះ តែប៉ុណ្ណោះ ដែលត្រូវបូមទឹកដាក់រថយន្តមួយគ្រឿង ត្រូវចំណាយរយៈពេល ២០ នាទីទើបពេញ១រថយន្ត។ ករណីនេះសមត្ថកិច្ចធ្លាប់បានស្នើសុំខាងរដ្ឋករទឹកនៃមន្ទីរឧស្សាហកម្ម និងសិប្បកម្មខេត្តឲ្យជួយប្ដូរទុយយោបូម ដែលមានទំហំ ១ តឹកវិញ ទើបអាចបូមក្នុងរយៈពេលតែ ១ ០នាទីប៉ុណ្ណោះ គឺពេញមួយរថយន្តហើយ ទើបងាយស្រួលក្នុងការបូមដាក់រថយន្ត ពេលចេញអន្តរាគមន៍ពន្លត់គ្រោះអគ្គិភ័យ។ ប៉ុន្តែការស្នើសុំខាងលើនេះ មិនត្រូវបានមន្ត្រីជំនាញខាងរដ្ឋករទឹកជួយដោះស្រាយឲ្យឡើយ ដូចនេះសមត្ថកិច្ចនគរបាលពន្លត់អគ្គីភ័យ គោរពស្នើសុំឯកឧត្តមអភិបាលអភិបាល ខេត្តកំពង់ឆ្នាំង មេត្តាជួយសម្របសម្រួលដោះស្រាយឱ្យផងចុះ ដើម្បីការចេញអន្តរាគមន៍បាញ់ពន្លត់អគ្គិភ័យមានប្រសិទ្ធភាពខ្ពស់ ៕

អត្ថបទ៖ ឈៀង ថារិទ្ធ

Related Topics:ខេត្តកំពង់ឆ្នាំង