បុរសម្នាក់ស្លាប់ ក្រុមគ្រួសារឲ្យសមត្ថកិច្ចធ្វើកោសល្យវិច័យ ខ្លាចពាក់ព័ន្ធករណីផ្សេង

នៅវេលាម៉ោង១១ និង ៣០ នាទីថ្ងៃទី ២០ ខែមករា កម្លាំងសមត្ថកិច្ចនិងមានចូលរួមពីព្រះរាជអាជ្ញា បានចុះធ្វើកោសល្យវិច័យ បុរសម្នាក់ស្លាប់ដោយសារឆក់ខ្សែភ្លើង តែក្រុមគ្រួសារថាការស្លាប់នេះជាករណីផ្សេង។

ហេតុការណ៍បុរសខាងលើស្លាប់នោះ បានកើតឡើងនៅវេលាម៉ោង ៤ និង ៣០ នាទីរសៀលថ្ងៃទី ១៩ ខែមករាឆ្នាំ​២០២២ នៅចំណុចកន្លែងសាងសង់ទឹកស្អាតមួយកន្លែង ស្ថិតក្នុងភូមិព្រែក សង្កាត់ស្ទឹងត្រែង ក្រុងស្ទឹងត្រែង។

លោកយ៉េន ម៉ី ត្រូវជាពូជនរងគ្រោះបានឲ្យដឹងថា ក្មួយរបស់គាត់ដែលស្លាប់មានឈ្មោះមែន ភារម្យ ភេទប្រុសអាយុ ៤៦ ឆ្នាំ មានទីលំនៅភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។

លោក យ៉េន ម៉ីបានបន្តឲ្យដឹងទៀតថា ជនរងគ្រោះបានទៅធ្វើសំណង់នៅក្នុងក្រុមហ៊ុនទឹកស្អាតមួយកន្លែង ហើយនៅព្រឹកថ្ងៃទី២០មករានេះ គេប្រាប់ថាបានឆក់​ខ្សែភ្លើងស្លាប់។

លោកបន្តថា ក្រោយដឹងថាក្មួយឆក់ខ្សែ​ភ្លើង​ស្លាប់ គាត់ក៏ចុះមកមើលក្មួយហើយខ្លាចថា ជាករណីផ្សេងក៏ស្នើដល់សមត្ថកិច្ចចុះមកធ្វើកោសល្យវិច័យ ដើម្បីរកការពិត។ ក្រោយការចុះពិនិត្យមើលរបស់សមត្ថកិច្ចកុសល្យ​វិច្ច័យ និងមានការចូលរួមពីព្រះរាជអាជ្ញាផង​នោះ ជនរងគ្រោះពិតជាស្លាប់ដោយសារឆក់ខ្សែភ្លើងពិតប្រាកដមែន។

ក្រោយពិនិត្យមិនមានពាក់ព័ន្ធក្នុងករណីផ្សេងទេនោះ ជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យទៅតាមប្រពៃណី៕

អត្ថបទ៖ ងិនលីម