សន្តិសុខសង្គម

ឃាត់ខ្លួនមនុស្ស ៩ នាក់ ករណីលួចបូមប្រេងរថយន្ត និងគ្រឿងចក្រធ្វើផ្លូវរបស់ជប៉ុន យកលក់

បានផុស

៣ years មុន

នៅ

ថ្ងៃពុធ ២៦ មករា ២០២២

ដោយ

ជនសង្ស័យ ៩ នាក់ ត្រូវសមត្ថកិច្ចនគរបាលខេត្តកំពង់ឆ្នាំងបង្ក្រាប និងឃាត់ខ្លួន ពាក់ព័ន្ធករណីលួចបូមប្រេងរថយន្ត និងគ្រឿងចក្រចេញពីក្រុមហ៊ុនជប៉ុន ដែលកំពុងសាងសង់ផ្លូវជាតិលេខ ៥ និងទទួលផលចោរកម្ម។ ការបង្ក្រាបករណីនេះ បានធ្វើឡើងកាលពីយប់ថ្ងៃទី ២៥ ខែមករា ឆ្នាំ ២០២២ នៅក្នុងភូមិសំរោងឃុំតាជេស ស្រុកកំពង់ ត្រឡាច ខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចនគរបាលនៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា ការបង្ក្រាប និងឃាត់ខ្លួនក្រុមជនសង្ស័យខាងលើ ធ្វើឡើងក្រោមការបញ្ជារផ្ទាល់របស់ឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង និងលោកស្នងការនគរបាលខេត្តកំពង់ឆ្នាំង និងចុះប្រតិបត្តិការដោយមន្ត្រីនគរបាលខេត្តកំពង់ឆ្នាំង។

សមត្ថកិច្ចបានបញ្ជាក់ថា ជនសង្ស័យដែលបានឃាត់ខ្លួនរួមមាន ១. ឈ្មោះ កែត ភា , ២. ឈ្មោះ ខៀវ សាវឿន, ៣. ឈ្មោះ ឃឿន វិសាល, ៤. ឈ្មោះ ទន់ សាតូ, ៥. ឈ្មោះ ប៉ាត់ ប៊ុនលី, ៦. ឈ្មោះ យក់ សីហា ត្រូវចោទប្រកាន់ពីបទ ផ្តើមគំនិតក្នុងអំពើលួច។ ៧. ឈ្មោះ ម៉ាត់ គ្រីយ៉ា ត្រូវចោទប្រកាន់ពីបទលួចលក់ប្រេង ៨. ឈ្មោះ តឹបណាត និង ៩. ឈ្មោះ សុខ ពិសិដ្ឋ ចោទពីបទទទួលផលចោរកម្ម អ្នកទទួលទិញប្រេង ដែលបានប្រព្រឹត្តនៅចំណុចផ្លូវជាតិលេខ ៥ ស្ថិតក្នុងភូមិសំរោង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ នៅក្នុងកិច្ចប្រតិបត្តិការនេះ សមត្ថកិច្ចដកហូតបានប្រេងម៉ាស៊ូត ចំនួន ០៨កាន និងរថយន្តលួចចូលទៅបូមប្រេង ចំនួន ០១ គ្រឿង ម៉ាក Nissan (Frontier) ពណ៌ទឹកប្រាក់។

ករណីខាងលើនេះ តាមប្រភពពីប្រជាពលរដ្ឋបានឲ្យដឹងថា ពួកគាត់បានរាយការណ៍ជូនសមត្ថកិច្ចផ្ទាល់ថា មានមនុស្សមួយក្រុមជាអ្នកស៊ី ឈ្នួលបើកគ្រឿងចក្រ និងរថយន្តឱ្យក្រុមហ៊ុនជប៉ុន បានឃុបឃិតគ្នាជា មួយសន្តិសុខយាមគ្រឿងចក្រ បើកដៃឱ្យជនសង្ស័យឈ្មោះ តឹប ណាត និងឈ្មោះ សុខ ពិសិដ្ឋ ចូលទៅទិញប្រេងដែលពួកខ្លួនបានបូមចេញពីគ្រឿងចក្រនៅនឹងការដ្ឋានទាំងយប់តែម្តង។ ដែលករណីលួចបូមប្រេងលក់នេះ មិនមែនជាលើកទី ១ របស់ពួកគេទេ គឺជនសង្ស័យទាំងនេះតែងតែប្រព្រឹត្តជាច្រើន លើកច្រើនសារ

ហើយរាល់ការប្រព្រឹត្តម្តងៗ គឺមាន ការចាត់តាំងបក្ខពួក ដើម្បីរៀបចាំលួចបូមប្រេង។ ដោយឡែកប្រេងដែលឈ្មួញដាក់លក់តាមផ្លូវជាកានៗនោះ ភាគច្រើនគឺអ្នកស៊ីឈ្នួលបើករថយន្តធំៗ ឬអ្នកស៊ីឈ្នួលបើកគ្រឿងចក្រជាអ្នកលួចបូមយកទៅលក់ឲ្យឈ្មួញនៅតាមទីប្រជុំជន។

ប្រជាពលរដ្ឋខេត្តកំពង់ឆ្នាំង និងក្រុមហ៊ុនជប៉ុន សូមថ្លែងអំណរគុណយ៉ាងជ្រាលជ្រៅចំពោះចំណាត់ ការរបស់ឯកឧត្តមព្រះរាជអាជ្ញាខេត្តកំពង់ឆ្នាំង និងសមត្ថកិច្ចនគរបាលខេត្តកំពង់ឆ្នាំង ក្រោមការដឹកនាំរបស់ លោកឧត្តមសេនីយ៍ត្រី ខូវ លី ស្នងការខេត្តកំពង់ឆ្នាំង ដែលបង្ក្រាបបានដោយជោគជ័យនូវបទល្មើសខាងលើនេះ៕

អត្ថបទ៖ ឈៀងថារិទ្ធ

Related Topics:ករណីលួច