សមត្ថកិច្ច​ចាប់ខ្លួន​ជនសង្ស័យ​ ៣ នាក់​ ឆក់ទូរសព្ទ​បញ្ជូន​ទៅ​តុលាការ​

សមត្ថកិច្ចជំនាញនៃការិយាល័យប្រឆាំងបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានចាប់បញ្ជូនខ្លួនជនសង្ស័យ ៣នាក់ ទៅសាលាដំបូងរាជធានីភ្នំពេញ ដើម្បីផ្តន្ទាទោសតាមនីតិវិធីច្បាប់ពាក់ព័ន្ធករណីឆក់ទូរស័ព្ទដៃប្រជាពលរដ្ឋ។ 

បុរសជនសង្ស័ទាំង ៣ នាក់ ទី១ ឈ្មោះ សុខ សុវណ្ណឧត្តមរង្សី អាយុ ២៧ ឆ្នាំ ទី២ ឈ្មោះ ទឹម ពុធ អាំយុ ២៣ ឆ្នាំ និងទី៤ ឈ្មោះ យេន វ៉ាន់នី អាយុ ២២ ឆ្នាំ អ្នកទាំង ៣ រស់នៅរាជធានីភ្នំពេញ។

សមត្ថកិច្ចបានឱ្យដឹងថា ហេតុការណ៍ឆក់ទូរសព្ទ បានកើតឡើងនៅថ្ងៃទី ២៤ ខែមករា ឆ្នាំ ២០២២ នៅចំណុចមុខសាលារៀន IU ផ្លូវលេខ១៩៨៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

បន្ទាប់ពីទទួលបានបណ្តឹងរបស់ជនរងគ្រោះ កម្លាំងជំនាញ សហការជាមួយកម្លាំងមូលដ្ឋានអាវុធហត្ថខណ្ឌសែនសុខ អាវុធហត្ថខណ្ឌកំបូល និងអាវុធហត្ថស្រុកអង្គស្នួល បានស្រាវជ្រាវរហូតឈានដល់ការឃាត់ខ្លួនបានជនសង្ស័យទាំង ៣នាក់ នៅចំណុចមាត់ស្ទឹង ភូមិប្រាំបីមុំ ស្រុកអង្គស្នួល ខេត្តកណ្តាល យកមកធ្វើការសាកសួរ។  

ក្រោមវិធានការជំនាញជនសង្ស័យទាំង ៣នាក់បានសារភាពឲ្យដឹងដូចគ្នាថា ពួកខ្លួន និងបក្ខពួកផ្សេងទៀត បានចូលរួមធ្វើសកម្មភាពឆក់កាបូបពីជនរងគ្រោះពិតប្រាកដមែន។

បក្ខពួកជនសង្ស័យដែលបានរត់គេចខ្លួន កម្លាំងជំនាញអាវុធហត្ថរាជធានីភ្នំពេញ កំពុងធ្វើការស្រាវជ្រាវឃាត់ខ្លួនបន្ត។ ចំណែកវត្ថុតាងទូរស័ព្ទដៃ បានប្រគល់ជូនជនរងគ្រោះវិញ។ 

ជនសង្ស័យឈ្មោះ សុខ សុវណ្ណឧត្តមរង្សី ហៅ តូ ជាមុខសញ្ញាធ្លាប់ធ្វើសកម្មភាពឆក់ទ្រព្យសម្បត្តិមានតម្លៃពីប្រជាពលរដ្ឋជាច្រើនលើក ក្នុងភូមិសាស្រ្តរាជធានីភ្នំពេញ ហើយរូបគេធ្លាប់ជាប់ពន្ធនាគារព្រៃសចំនួន០៣ឆ្នាំមកហើយ។ ចំណែកជនសង្ស័យ ទឹម ពុធសំណាង ជាមុខសញ្ញាធ្លាប់ធ្វើសកម្មភាពឆក់ទូរស័ព្ទដៃ ហើយធ្លាប់ជាប់ពន្ធនាគារព្រៃសរយៈពេលជាង២ឆ្នាំ៕

អត្ថបទ៖ រ៉ាវុទ្ធ