ស្នងការខេត្ត​មណ្ឌលគិរី​ បញ្ជាក់ថា​ ករណី​សម្លាប់​ទាំងគ្រួសារ​នៅមណ្ឌលគិរី​ ជា​ករណីឃាតកម្ម​

ស្នងការនគរបាល​ខេត្តមណ្ឌលគិរី កំពុងស្រាវជ្រាវ ករណីឃាតកកម្មសម្លាប់ទាំងគ្រួសារនៅភូមិ មេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី។

លោក ឡោ សុខា ស្នងការនគរបាលខេត្តមណ្ឌលគិរី នៅថ្ងៃទី ៣ ខែកុម្ភៈនេះ បានបញ្ជាក់ថា ករណីដែលកើតឡើង​ទៅលើ​គ្រួសារមួយនៅស្រុកពេជ្រាដា ជាករណីឃាតកម្ម បណ្ដាលឱ្យសមាជិកគ្រួសារ ៥ នាក់ ស្លាប់បាត់​បង់​ជីវិត និងកូនម្នាក់រួចជីវិត។

លោកថា បច្ចុប្បន្នសមត្ថកិច្ច កំពុងធ្វើការស្រាវជ្រាវ ដោយមិនទាន់កំណត់ដឹងពីដើមចមនៃករណីនេះទេ ប៉ុន្តែជំហានដំបូងសមត្ថកិច្ចសន្និដ្ឋានថា ជាករណីឃាតកម្ម។

សូមជំរាបថា ករណីឃាតកម្ម បានកើតឡើង នៅចំណុចស្រែចោល ក្នុងភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី កាលពីវេលាម៉ោង ១១៖៣០ យប់ ថ្ងៃទី ២ ខែកុម្ភៈ បណ្ដាល​ឱ្យ​មនុស្សចំនួន ៥ នាក់ ក្នុងចំណោម ៦ នាក់ក្នុងគ្រួសារ បានស្លាប់បាត់បង់ជីវិត។

ជនរងគ្រោះដែលស្លាប់ ជាជនជាតិព្នង ទី១ មានឈ្មោះ ម៉ូត ក្រាក់ ភេទប្រុស អាយុ ៤៥ ឆ្នាំ ទី២ ឈ្មោះ ក្រាក់ លី ភេទប្រុស អាយុ ១៥ ឆ្នាំ ទី៣ ឈ្មោះ នួន សំអាត ភេទប្រុស អាយុ ១៥ ឆ្នាំ ទី៤ ឈ្មោះ និច ស្រី ភេទស្រី អាយុ ៤១ ឆ្នាំ ទី ៥ ឈ្មោះ ក្រាក់ នី ភេទ ប្រុស អាយុ ០៥ ឆ្នាំ អ្នកទាំង ៥ ស្លាប់បាត់បង់ជីវិត និងទី៦ ឈ្មោះ ក្រាក់ ស្ល៊ី ភេទ ប្រុស អាយុ ១២ ឆ្នាំ រងរបួសធ្ងន់៕

អត្ថបទ៖ ឡេង ដេត