រកឃើញម៉ូតូអត់ពន្ធជាង៣០គ្រឿងក្នុងហាងលក់ដូរ«ភា​រុណស្រុងមី»

កម្លាំងនគរបាលបានចុះដកហូតម៉ូតូចំនួន៣១គ្រឿង ពីហាងលក់ដូរមួយកន្លែងដែលមានយីហោ «ភា​រុណស្រុងមី» បន្ទាប់ពីឆែកឆេមិនមានឯកសារពាក់ព័ន្ធត្រឹមត្រូវ។

ប្រតិបត្តិការចុះបង្ក្រាបទីតាំងទិញលក់ម៉ូតូខុសច្បាប់នេះ បានធ្វើឡើងកាលពី​ថ្ងៃទី​០២ ខែកុម្ភៈ ឆ្នាំ​២០២២ នៅចំណុចហាងទិញលក់ម៉ូតូយីហោ«ភារុណស្រុងមី» ស្ថិតនៅក្នុងភូមិ​កាតា​យ ឃុំ​សូ​យោង ស្រុក​តាំងគោក ខេត្តកំពង់ធំ ដឹកនាំ​សម្របសម្រួល​ដោយ​លោក សាយ វាសនា ព្រះរាជអាជ្ញារង និង​ជា​អ្នកនាំពាក្យ​នៃ​អយ្យការ​អម​សាលាដំបូង​ខេត្តកំពង់ធំ។

សមត្ថកិច្ចបានឲ្យដឹងថា ម្ចាស់ទីតាំងមានឈ្មោះ បួយ ស្រុងធី ជាប្ដី និងឈ្មោះ ហេង ភារុណ ជា​ប្រពន្ធ ត្រូវឃាត់ខ្លួន។

បន្ទាប់ពីដកហូត វត្ថុតាងរួមទាំងម្ចាស់ទីតាំង ត្រូវបានបញ្ជូនទៅអធិការដ្ឋាន​នគរបាល​ស្រុក​តាំងគោក ដើម្បី​រៀបចំ​កសាង​សំណុំរឿង​បញ្ជូនទៅ​តុលាការ ចាត់វិធានការ​តាមផ្លូវ​ច្បាប់៕

អត្ថបទ៖ សុខុម

​​