ពលករខ្មែរ ២៨៣នាក់ ត្រូវភាគីថៃបញ្ជូនមកកម្ពុជាវិញ រកឃើញស្ត្រីម្នាក់វិជ្ជមានកូវីដ-១៩

បាត់ដំបង៖ កម្លាំងការពារតំបន់ព្រំដែនស្រុកកំរៀង បានប្រាប់ឱ្យដឹងថា នៅថ្ងៃទី១០ ខែកុម្ភៈ ឆ្នាំ២០២២នេះ កម្លាំងជំនាញបានទទួលពលករខ្មែរប្រុសស្រីពីភាគីទាហានថៃសរុបចំនួន ២៨៣នាក់ ក្នុងនោះបុរសចំនួន ៨៩នាក់ ក្មេងៗចំនួន៨៤នាក់ និងស្ត្រី១១០នាក់ ដោយបានតេស្តរកឃើញម្នាក់ផ្ទុកជំងឺកូវីដ-១៩។

ប្រភពដដែលបន្តថា ក្នុងចំនួនពលករខាងលើ មន្ត្រីជំនាញបានរកឃើញស្ត្រីតែម្នាក់ប៉ុណ្ណោះវិជ្ជមានកូវីដ-១៩ ក្រៅពីនេះអវិជ្ជមានទាំងអស់ដែលគ្រូពេទ្យជំនាញបានពិនិត្យភ្លាមៗបន្ទាប់ពីទាហានថៃបានបញ្ជូនមលដល់ព្រំដែនប្រទេសកំណើតវិញ។

ប្រភពដដែលបន្តថា ពលករទាំងអស់ខាងលើបានពិនិត្យមានកាតចាក់វ៉ាក់សាំងការពារជំងឺកូវីដ-១៩ ចំនួន ២៣៧នាក់ក្រោយអប់រំណែនាំ សមត្ថកិច្ចអនុញ្ញាតឱ្យពួកគេវិលត្រឡប់ទៅកាន់លំនៅដ្ឋានរៀងៗខ្លួនវិញ។ ចំណែកស្រ្តីម្នាក់ដែលវិជ្ជមានកូវីដ-១៩ គ្រូពេទ្យបានបញ្ជូនទៅមណ្ឌលដើម្បីព្យាបាល ក្រៅពីនេះតម្រូវឱ្យធ្វើចត្តាឡីស័កតាមដានសុខភាពបន្តទៀត៕

អត្ថបទ៖ សៅ សារិទ្ធ