សន្តិសុខសង្គម

តុលាការខេត្តកណ្តាល សម្រេចចេញដីកាឃុំខ្លួនក្រុមចោរប្លន់ម៉ូតូសកម្មប្រចាំរាជធានីនិងខេត្តកណ្តាល០៥នាក់ ដាក់ពន្ធនាគារ

បានផុស

៣ years មុន

នៅ

ថ្ងៃសុក្រ ១១ កុម្ភៈ ២០២២

ដោយ

កណ្តាល ៖ ក្រុមចោរឆក់ចំនួន០៥នាក់ ដែលសកម្មខាងស្ទាក់កាប់ប្លន់ប្លន់ម៉ូតូពីប្រជាពលរដ្ឋប្រចាំរាជធានីភ្នំពេញនិងខេត្តកណ្តាល នៅល្ងាចថ្ងៃទី១០ ខែកុម្ភៈ ឆ្នាំ២០២២ ត្រូវបានលោកប្លុង វិសាល ចៅក្រមស៊ើបសួរសាលាដំបូង ខេត្តកណ្តាលបានសម្រេចចេញដីកាឃុំខ្លួនដាក់ពន្ធនាគារបណ្ដោះអាសន្ន ពីបទ “លួចមានស្ងានទម្ងន់ទោស ” តាមមាត្រា ៣៥៣ ,៣៥៧ នៃក្រមព្រហ្មទណ្ឌ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដែលប្រព្រឹត្តនៅថ្ងៃទី០៧ ខែកុម្ភៈ ឆ្នាំ២០២២ វេលាម៉ោង១៩និង៣០នាទី នៅចំណុចចំការធ្នង់ ភូមិព្រែកលួង ឃុំព្រែកលួង ស្រុកខ្សាច់កណ្ដាល ខេត្តកណ្តាល ។

ជនរងគ្រោះឈ្មោះ សែ ចន្ធូ ភេទប្រុស អាយុ៤២ឆ្នាំ ជនជាតិ ខ្មែរមុខរបរ មេការជាងសំណង់បុរីចតុមុខ មានទីលំនៅភូមិ ជាប់ ឃុំជ្រលង ស្រុកបារាយណ៍ ខេត្តកំពង់ធំ ។

ជនត្រូវចោទទី១ឈ្មោះ ខេមរ៉ា ផល្លា ហៅ ឡា ភេទប្រុស អាយុ១៨ឆ្នាំ ជនជាតិខ្មែរ មុខរបរសិស្ស មានទីលំនៅភូមិក្រោគោ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ ទី២ឈ្មោះ រាជ វិសាល ភេទប្រុស អាយុ១៦ឆ្នាំ ជនជាតិខ្មែរ មុខរបរសិស្ស មានទីលំនៅភូមិផ្សារតូច សង្កាត់ឫស្សីកែវ១ ខណ្ឌឫស្សីកែវ រាជធានីភ្នំពេញ ។ ទី៣ឈ្មោះ ដាវ វិសាល ហៅ ពក ភេទប្រុស អាយុ១៦ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិក្រោគោ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ ទី៤ឈ្មោះ មាស សារី ហៅ ធីយ៉ា ភេទប្រុស អាយុ១៧ឆ្នាំ ជនជាតិខ្មែរ មុខរបរ សិស្ស មានទីលំនៅភូមិបឹងស្រឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ និងទី៥ឈ្មោះ ធឿន ប៊ុនលាភ ភេទប្រុស អាយុ១៦ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិឃ២ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ ។

សមត្ថកិច្ចបានប្រាប់ឲ្យដឹងថា នៅថ្ងៃទី០៧ ខែកុម្ភៈ ឆ្នាំ២០២២ ជនរងគ្រោះបានជិះម៉ូតូចេញពីកន្លែងធ្វើការនៅបុរីចតុមុខឃុំស្វាយជ្រំ មកលេងផ្ទះមិត្តភក្តិនៅឃុំវិហារសួគ៌ ពេលមកដល់ចំណុចចំការធ្នង់ ភូមិព្រែកលួង ឃុំព្រែកលួង ក៏ជួបជនសង្ស័យទាំង១១នាក់ខាងលើជិះម៉ូតូចំនួន០៤គ្រឿង ម៉ាកSUZAKI Nex ចំនួន១គ្រឿង ម៉ាក់HONDA C125 ស៊េរី២០២១ចំនួន១គ្រឿង ម៉ាកHONA C125 ស៊េរី២០១៥ ១គ្រឿង និងម៉ូតូម៉ាកMSX ចំនួន១គ្រឿង បានធ្វើសកម្មភាពកាប់ប្លន់យកម៉ូតូជនរងគ្រោះជិះគេចខ្លួនទៅទិសខាងជើងចូលក្នុងក្រុមហ៊ុន7NGឆ្ពោះមកតាមផ្លូវជាតិលេខ៨ រួចជិះត្រឡប់ទៅឆ្លងដរអរិយក្សត្រគេចខ្លួនទៅរាជធានីភ្នំពេញ ចំណែកជនរងគ្រោះរងរបួសរយះក្បាលមួយកន្លែងត្រូវបានបញ្ជូនទៅព្យាបាលនៅមន្ទីរពេទ្យ ។

រហូតដល់ម៉ោង២២និង០០នាទី ថ្ងៃដដែលកម្លាំងសមត្ថកិច្ចនគរបាលខណ្ឌដូនពេញ រាជធានីភ្នំពេញ បាបចុះល្បាតតាមគោលដៅរបស់ខ្លួន ដោយមានការសង្ស័យក៏ឃាត់ខ្លួនជនសង្ស័យបាន៥នាក់ ម៉ូតូចំនួន៣គ្រឿង ម៉ូតូជនសង្ស័យជិះធ្វើសកម្មភាពចំនួន២គ្រឿង ម៉ាកNex និងម៉ាកHONDA C125 ស៊េរី២០២១ និងម៉ូតូម៉ាកHONDA C125 ស៊េរី២០២០ ជាម៉ូតូជនរងគ្រោះឈ្មោះ សែ ចន្ធូ ដែលជនសង្ស័យកាប់ប្លន់យកទៅ។

ដល់ថ្ងៃទី០៨ ខែកុម្ភៈ ឆ្នាំ២០២២ សមត្ថកិច្ចនគរបាលខណ្ឌដូនពេញ បានប្រគល់ជនសង្ស័យទាំង៥នាក់ និងវត្ថុតាងម៉ូតូចំនួន៣គ្រឿង មកឲ្យសមត្ថកិច្ច អធិការដ្ឋាននគរបាលស្រុកខ្សាច់កណ្តាល បន្តចាត់ការតាមនីតិវិធីច្បាប់៕

ដោយ ៖ ឆៃ យ៉ា