សន្តិសុខសង្គម

កូនឈឺចុកពោះ ហៅគ្រូពេទ្យមកចាក់ថ្នាំប្រកាច់ស្លាប់ភ្លាមៗ

បានផុស

៣ years មុន

នៅ

ថ្ងៃចន្ទ ១៤ កុម្ភៈ ២០២២

ដោយ

លោកគ្រូពេទ្យឯកជនម្នាក់ ត្រូវបានកម្លាំងនគរបាលឃាត់ខ្លួន បន្ទាប់ពីទៅព្យាលជំងឺឲ្យក្មេងប្រុសម្នាក់ តែបែជាប្រកាច់បែកពពុះមាត់ស្លាប់ភ្លាមៗ ពេលចាក់ថ្នាំរួច។

ករណីនេះបានកើតឡើងកាលពីថ្ងៃទី១២ ខែកុម្ភៈ ឆ្នាំ២០២២ នៅចំណុចភូមិកណ្ដាល ឃុំស្វាយចេក ស្រុករំដួល ខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា លោកគ្រូពេទ្យដែលឃាត់ខ្លួនមានឈ្មោះ វ៉ាត់ ចន្ថន ភេទប្រុស អាយុ៣៦ឆ្នាំ មុខរបរគ្រូពេទ្យ រស់នៅភូមិកណ្ដាល ឃុំស្វាយចេក ស្រុករំដួល ខេត្តស្វាយរៀង។ ចំណែកក្មេងប្រុសរងគ្រោះមានឈ្មោះ ជៀក ណាដេត អាយុ៧ឆ្នាំ មុខរបរជាសិស្សរស់នៅភូមិថ្មី ឃុំស្វាយចេក ស្រុករំដួល ខេត្តស្វាយរៀង។

សមត្ថកិច្ចបានបញ្ជាក់ថា ក្រោយពីគ្រូពេទ្យចាក់ថ្នាំឲ្យក្មេងប្រុសរងគ្រោះរួច គ្រាន់តែដកម្ជុលចេញស្រាប់តែក្មេងរងគ្រោះមានសភាពប្រកាច់ខាំអណ្ដាតបែកពពុះមាត់ បណ្ដាលអោយស្លាប់ភ្លាមៗ បង្កការភ្ញាក់ផ្អើលដល់ក្រុមគ្រួសារតែម្ដង និងបានរាយការណ៍សុំអន្តរាគមន៍ពីសមត្ថកិច្ច។

ក្រោយកើតហេតុ កម្លាំងសមត្ថកិច្ចបានឃាត់ខ្លួនគ្រូពេទ្យដែលចាក់ថ្នាំបណ្ដាលឲ្យក្មេងប្រុសស្លាប់ នាំមកកាន់អធិការដ្ឋាននគរបាលស្រុករំដួល ដើម្បីធ្វើការសាកសួរ និងចាត់ការតាមផ្លូវច្បាប់។ ចំណែកសព ត្រូវបានធ្វើកំណត់ហេតុ ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ សុខុម