សន្តិសុខសង្គម

នគរបាលខណ្ឌសែនសុខ ឃាត់ខ្លួនជនសង្ស័យ១១នាក់ករណីធាក់ប្លន់យកម៉ូតូពីយុវជនម្នាក់

បានផុស

៣ years មុន

នៅ

ថ្ងៃអាទិត្យ ២៧ កុម្ភៈ ២០២២

ដោយ

ជនសង្ស័យប្រុសស្រីចំនួន១១នាក់ ត្រូវបានកម្លាំងប៉ុស្តិ៍នគរបាលរដ្ឋបាលសង្កាត់ឃ្មួញ នៃអធិការដ្ឋាននគរបាលខណ្ឌសែនសុខ ធ្វើការឃាត់ខ្លួនយកមកសួរនាំនិងកសាងសំណុំរឿងបញ្ជូនបន្ត ក្រោយធ្វើសកម្មភាពធាក់ប្លន់យកម៉ូតូពីយុវជនម្នាក់។

ការឃាត់ខ្លួនជនសង្ស័យទាំង១១នាក់នេះ បានធ្វើឡើងកាលពីវេលាម៉ោង១៤និង០០នាទី ថ្ងៃទី២៦ ខែកុម្ភៈ ឆ្នាំ២០២២ បន្ទាប់ពីធាក់ប្លន់យកម៉ូតូពីជនរងគ្រោះនៅចំណុចម្តុំក្បាលហុងទឹក ផ្លូវវិមានឈ្នះឈ្នះ ភូមិត្រពាំងរាំងចាស់ សង្កាត់ឃ្មួញ ខណ្ឌសែនសុខ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ហួ ម៉េងវ៉ាង អធិការ នៃអធិការដ្ឋាននគរបាលខណ្ឌសែនសុខ បានឲ្យដឹងថា ជនសង្ស័យទាំង១១នាក់បានធ្វើសកម្មភាពដោយប្រើជើងធាក់យកម៉ូតូ០១គ្រឿង ម៉ាកសេ១២៤ ពណ៌ខ្មៅ គ្មានស្លាកលេខ ពីជនរងគ្រោះឈ្មោះ ហឿន ថា ភេទប្រុស អាយុ១៨ឆ្នាំ ជនជាតិខ្មែរមុខរបរបើកឡានដឹកដែកសំណង់ ស្នាក់នៅផ្ទះសង់ថ្មី ផ្លូវបេតុង ភូមិកប់ស្រូវតូច សង្កាត់គោករការ ខណ្ឌព្រែកព្នៅ ។

លោកអធិការបានបន្តថា ក្រោយឃាត់ខ្លួនជនសង្ស័យ កម្លាំងសមត្ថកិច្ចបានដកហូតម៉ូតូ០៥គ្រឿង ក្នុងនោះ ម៉ូតូរបស់ជនគ្រោះ១គ្រឿងម៉ាកសេ១២៥ ពណ៌ខ្មៅ គ្មានស្លាកលេខ ត្រូវបានប្រគល់ឲ្យជនរងគ្រោះវិញ។ និង៤គ្រឿងទៀតជារបស់ក្រុមជនសង្ស័យរួមមាន៖ ម៉ាកសេ១២៥ ពណ៌ខ្មៅ ផលិតឆ្នាំ២០២០ ពាក់ស្លាកលេខភ្នំពេញ1lk-9603 ម៉ាកនិច ពណ៌លឿង ផលិតឆ្នាំ២០១៩ ពាក់ស្លាកលេខភ្នំពេញ1lB-4228 ម៉ាកសេ១២៥ ពណ៌ខ្មៅ ផលិតឆ្នាំ២០១៨ ពាក់ស្លាកលេខភ្នំពេញ1GY-5896 , ម៉ាកសេ១២៥ ពណ៌ខ្មៅ ផលិតឆ្នាំ២០១០ ពាក់ស្លាកលេខកំពង់ចាម1D-8368 ។

បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធីច្បាប់៕

អត្ថបទ៖ សុខុម

Related Topics:ករណីចោរកម្ម