អាជ្ញាធរខណ្ឌទួលគោកចាត់វិធានក្ដៅ ចំពោះបញ្ហា សណ្ដាប់ធ្នាប់ជុំវិញផ្សារនាគមាស ឃាត់រថយន្តដឹកបន្លែបាន២គ្រឿង

ប្រធានគណៈបញ្ជាការឯកភាពខណ្ឌ និងជាអភិបាល នៃគណៈអភិបាលខណ្ឌទួលគោក លោក ជា ពិសី នៅព្រឹកថ្ងៃទី០៤ ខែមីនា ឆ្នាំ២០២២នេះ បានដឹកនាំកម្លាំងគណៈបញ្ជាការឯកភាពខណ្ឌ ចុះចាត់វិធានក្ដៅ ក្នុងការរៀបចំសណ្ដាប់ធ្នាប់ទ្រង់ទ្រាយធំ នៅជុំវិញបរិវេណ ផ្សារនាគមាស ជាពិសេសផ្លូវលេខ ២៣១ ផ្លូវលេខ ២៣៤ មូលដ្ឋានសង្កាត់ផ្សារដើមគ ខណ្ឌទួលគោក ដើម្បីរំដោះផ្លូវជូនពលរដ្ឋងាយស្រួលធ្វើដំណើរទៅមកបានស្រួល និងដើម្បីលើកសោភ័ណភាពរាជធានីភ្នំពេញឱ្យមានការទាក់ទាញផងដែរ។

ក្នុងចុះការរៀបចំសណ្ដាប់ធ្នាប់ទ្រង់ទ្រាយធំ ខាងលើនេះបានធ្វើឡើងក្រោយមានការសំណូមរបស់ប្រជាពលរដ្ឋពីបញ្ហាសណ្ដាប់ធ្នាប់ នៅជុំវិញបរិវេណផ្សារនាគមាស លំបាកធ្វើដំណើរទៅមក និងចេញចូលផ្ទះ ប្រជាពលរដ្ឋបាន Comment ចូលហ្វេសប៊ុកផេករបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ដោយរៀបរាប់ពីទុក្ខលំបាកនៃការធ្វើដំណើរចូលផ្ទះរបស់ខ្លួនឯង ដោយសារតែឡានដឹកបន្លែឈប់លក់ហើយបានបិទផ្លូវសាធារណៈទាំងស្រុងតែម្ដង សុំឲ្យអាជ្ញាធរខណ្ឌជួយសម្របសម្រួល។

នៅក្នុងប្រតតិបត្តិការនេះគណៈបញ្ជាការឯកភាពខណ្ឌ បានឃាត់រថយន្តដឹកបន្លែ ដែលចតខុសកន្លែងដែលត្រូវចតចំនួន២គ្រឿង បញ្ជូនទៅអធិការដ្ឋាននគរបាលខណ្ឌ ដើម្បីធ្វើការអប់រំ និងធ្វើកិច្ចសន្យា៕

អត្ថបទ៖ ស្រីរ័ត្ន