ម្ចាស់ក៏ស្លាប់ សត្វក៏ងាប់ ខណៈកៀងគោមកផ្ទះ ដើរជាន់មីន

ក្មេងប្រុសម្នាក់ បានស្លាប់យ៉ាងអាណោចអាធ័មជាទីបំផុត ខណៈដែលកំពុងកៀងគោឲ្យត្រឡប់ទៅផ្ទះ ស្រាប់តែជាន់គ្រាប់មីនតោនមួយគ្រាប់​។ ករណីនេះ​បានកើត​ឡើង កាលពី​ថ្ងៃទី ៨ ខែមីនា ឆ្នាំ​២០២២ នៅវេលា​ម៉ោង ៤ និង ៤០ នាទីល្ងាច ស្ថិតនៅ​ចំណុច​ឆ្លាក ក្នុងភូមិ​ព្រៃទទឹង ឃុំ​ឆ្នាល់មាន់ ស្រុក​គាស់ក្រឡ ខេត្តបាត់ដំបង។

នៅក្នុង​ករណីនេះ​ដែរ សមត្ថកិច្ច​បានបញ្ជាក់​ថា ជនរងគ្រោះ​បាន​កៀងគោ​ឲ្យ​វិល​ទៅ​ភូមិ​វិញ​ព្រោះ​ល្ងាច​ហើយ​។ ពេលមកដល់​ត្រង់ចំណុច​ខាងលើ ទំនងជា​សត្វ​គោ​បាន​ជាន់​ទៅលើ​គ្រាប់​មីនតោន បណ្តាលឲ្យ​ផ្ទុះឡើង ងាប់​គោ ១ ​ក្បាល និង​ស្លាប់​មនុស្ស​ម្នាក់​ឈ្មោះ សឿន វ៉ាន់​ស៊ី​ង ភេទ​ប្រុស អាយុ ១៣ ​ឆ្នាំ រស់នៅ​ក្នុងភូមិ ឃុំ​កើតហេតុ​ខាងលើជា​ម្ចាស់​គោ។

តាម​ការសិក្សា​គឺ​សមត្ថកិច្ច​បាន​អះអាងថា គ្រាប់មីន​នេះ​អាច​នៅ​សេសសល់​ពី​សម័យ​សង្គ្រាម ហើយ​អាច​អណ្តែត​ឡើងមក​លើ​បន្ទាប់ពី​ត្រូវ​ទឹកភ្លៀង​ញឹកញាប់ ទើប​ធ្វើឲ្យសត្វ​គោ​ជាន់​តែម្តង៕

អត្ថបទ៖ សោ និយម​រ័ត្ន​