តុលាការសម្រេចផ្ដន្ទាទោសបុរសជនជាតិចិន ៣ នាក់ ឱ្យជាប់ពន្ធនាគារមួយជីវិត ពាក់ព័ន្ធការចរាចរ និងជួញដូរគ្រឿងញៀន

ចៅក្រមជំនុំជម្រះសាលាដំបូងរាជធានីភ្នំពេញលោកស្រី សាយ ស្រីល័ក្ខណ៍ ប្រធានក្រុមប្រឹក្សា បាប្រកាសសាលក្រមសម្រេចផ្តន្ទាទោសលើជនជាប់ចោទជនជាតិចិនចំនួន៣នាក់ ដាក់ពន្ធនាគារម្នាក់ៗ អស់មួយជីវិត និងពិន័យជាប្រាក់ចំនួន ១០០លានរៀលបង់ចូលថវិការដ្ឋ ក្រោមការចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន ជាង១គីឡូ។

បុរសជនជាប់ចោទ ទាំង ៣ នាក់ ទី១ ឈ្មោះ ZI SIBEI ហៅ ស៊ីន អាយុ ៤៩ ឆ្នាំ ទី២ ឈ្មោះ BA YUN អាយុ ២៤ ឆ្នាំ និងទី៣ ឈ្មោះ HOU TAO ហៅ ជី អាយុ ២៤ ឆ្នាំ។

កាលពីវេលាម៉ោង ១១៖២៥នាទី ថ្ងៃទី ១៨ ខែ តុលា ឆ្នាំ២០២០ កម្លាំងជំនាញ នៃមន្ទីរប្រឆាំងគ្រឿងញៀន ដឹកនាំដោយលោក ឧត្តមសេនីយ៍ទោ ឃឹង សារ៉ាត់ នាយករងមន្ទីរ ប្រឆាំងបទល្មើសគ្រឿងញៀន ចូលរួមសហការ ពីកម្លាំង នៃស្នងការដ្ឋាននគរបាល រាជធានីភ្នំពេញ ដឹកនាំ ឮសម្របសម្រួលដោយ លោក សឿន មុនីរ័ត្ន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានស្រាវជ្រាវបង្ក្រាបករណីជួញដូរ រក្សាទុក គ្រឿងញៀន នៅចំណុច មុខបន្ទប់ ជួល ផ្លូវលេខ ២០០២ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

លទ្ធផលឃាត់ខ្លួនជនសង្ស័យ ០៣ នាក់ និងដកហូតវត្ថតាង៖ សារធាតុញៀន ៤៥ ក្រាម ប្រភេទ មេតំ ហ្វេតាមីន ទម្ងន់ ១៣៨៩.៤៣ ក្រាម គ្រាប់ (WY) ២៩,២១ ក្រាម អ៊ិចស្តាស៊ី ៣៤,៩០ ក្រាម ជញ្ជីងថ្លឹង ០១ គ្រឿង និង ទូរស័ព្ទ ០២ គ្រឿង។ ជនជាប់ចោទទាំង៣នាក់ត្រូវបានតុលាការឃុំខ្លួនអស់រយៈពេល២ឆ្នាំទើបឈានដល់ការកាត់ទោស និងផ្ដន្ទាទោសនេះ៕

អត្ថបទ៖ មករា