ក្មេងប្រុស អាយុ ៦ ឆ្នាំ ចុះលេងទឹកស្រះត្រូវជំងឺស្កន្ទរើឡើង ប្រកាច់លង់ទឹកស្លាប់

ក្មេងប្រុសម្នាក់ កើតមានជំងឺស្កន្ទ ប្រចាំកាយ បានចុះលេងទឹកស្រះក្បែរផ្ទះ ម្ដាយភ្លេចខ្លួនមួយភ្លែតស្របពេលជំងឺស្កន្ទរើឡើងផងនោះ ក៏ប្រកាច់នៅក្នុងទឹកលង់ស្លាប់។ ហេតុការណ៍​នេះ ​បានកើត​ឡើងនៅវេលា​ម៉ោង ១៧ និង ៤៥​នាទី កាលពីថ្ងៃទី​ ២៤ ខែមេសា ឆ្នាំ​ ២០២២ ស្ថិតនៅ​ភូមិ​លំ​ទង​ថ្មី ឃុំ​លំ​ទង ស្រុក​អន្លង់វែង ខេត្តឧត្ដរមានជ័យ​។

ជនរងគ្រោះ​ឈ្មោះ ផុន មករា ភេទ​ប្រុស អាយុ ០៦​ ឆ្នាំ រស់នៅ​ភូមិ​កើតហេតុ​ខាងលើ​មូលហេតុ កើត​ជំងឺ​ស្កន្ទ​ជ្រូក​ពេល​កំពុង​លេង​ទឹកស្រះ​ម្នាក់ឯង ក៏​ប្រកាច់​ធ្លាក់ចូល​ទឹក​ជ្រៅ​បណ្ដាលឱ្យ​លង់​ស្លាប់​តែម្តង។ ក្រោយ​សមត្ថកិច្ច ចុះទៅ​ត្រួតពិនិត្យ​កន្លែងកើតហេតុ និងបន្ទាប់ពី​ពិនិត្យ​សាកសព​រួច​ឃើញថា ជនរងគ្រោះ​បាន​ស្លាប់​ដោយសារ​លង់ទឹក​ពិតប្រាកដ​មែន រួចហើយ​ប្រគល់​សព​ជូន​ក្រុម​គ្រួសារ​ធ្វើបុណ្យ​តាម​ប្រពៃណី៕​

អត្ថបទ៖ ​ចាន់ ធី​