ភោជនីយដ្ឋាន «សុខុម ប្រជុំមិត្ត» លួចបង្កប់ល្បែងស៊ីសង តែលោកមេប៉ុស្តិ៍ថា មិនមានទេ

ភោជនីយដ្ឋាន សុខុម ប្រជុំមិត្ត ស្ថិតនៅក្រោយប៉ុស្តិ៍នគរបាលតាខ្មៅ ក្រុងតាខ្មៅ បានលួចបង្កប់ល្បែងជល់មាន់អនឡាញ និង បៀរ ផងដែរ កំពុង​ដំណើរការយ៉ាងរលូនទាំងយប់ទាំងថ្ងៃ។

ប្រភពព័ត៌មានច្បាស់ការណ៍បង្ហើបប្រាប់ថា ភោជនីយដ្ឋាន សុខុម ប្រជុំមិត្ត មួយនេះ បើកលេងទាំងល្បែងជល់មាន់អន​ឡាញ និងបៀរអនឡាញ ផងដែរ ដោយចាក់មួយគូរៗ រាប់ម៉ឺនរៀល ស្រែកហ៊ោ កងរំពង តែសមត្ថកិច្ចហាក់មិនបានដឹងទាល់តែសោះ។

ម្ចាស់ភោជនីយដ្ឋាន សុខុម ប្រជុំមិត្ត ដែលបង្កប់ល្បែងខុសច្បាប់នេះ ត្រូវបានគេស្គាល់ឈ្មោះថា សុខុម ភេទប្រុស អាយុជាង ៣០ ឆ្នាំ។ ប្រជាពលរដ្ឋ លើកឡើងថា ហេតុអ្វីនៅក្បែរប៉ុស្តិ៍នគរបាល បែរជាមានល្បែងស៊ីសងទោវិញ។

ពាក់ព័ន្ធបញ្ហានេះ លោក ប៉ុក វិចិត្រ មេប៉ុស្តិ៍តាខ្មៅ បានប្រាប់ឲ្យដឹងថា លោកបានធ្វើកិច្ចសន្យារួចហើយ គឺមិនមានលេងទៀតទេ។ ដោយឡែកលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់ឲ្យដឹងថា លោកនឹងពិនិត្យ ។

ប្រជាពលរដ្ឋ សង្ឃឹមថា ទីតាំងខាងលើនេះ នឹងត្រូវសមត្ថកិច្ចចុះបង្ក្រាបឲ្យស្របតាមគោលនយោបាយភូមិ-សង្កាត់ មានសុវត្ថិភាពរបស់រាជរដ្ឋាភិបាល៕

អត្ថបទ ៖ ឆៃ យ៉ា