ចាប់ខ្លួនឃាតកភេទទី ៣ ដែលសម្លាប់សង្សារនៅសង្កាត់ស្ទឹងមានជ័យទី ៣

ជនសង្ស័យភេទទី ៣ ជាឃាតក ដែលបានសម្លាប់ប្រុសស្នេហ៍របស់ខ្លួននៅក្នុងបន្ទប់ជួល ក្នុងសង្កាត់ស្ទឹងមានជ័យ ៣ ត្រូវបានចាប់ខ្លួនបានហើយ នៅចំណុចភូមិសែនរុងរឿង ១ ឃុំទឹកក្រហម ស្រុកជាំក្សាន្ត ខេត្តព្រះវិហារ កាលពីថ្ងៃទី ២៨ ខែមេសា ឆ្នាំ ២០២២។

ការចាប់ខ្លួននេះធ្វើឡើងដោយកម្លាំងនគរបាល នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការជាមួយនគរបាលរាជធានីភ្នំពេញ និងកម្លាំងនគរបាលខេត្តព្រះវិហារផងដែរ។

ជនសង្ស័យមានឈ្មោះ ភូ សៀងឡាង ភេទប្រុស អាយុ ២៧ ឆ្នាំ។ ចំណែកជនរងគ្រោះមានឈ្មោះ ខុម វ៉ានឌី ភេទប្រុស អាយុ ២១ ឆ្នាំ។

យោងតាមចម្លើយសារភាពរបស់ជនសង្ស័យចំពោះមុខសមត្ថកិច្ចឲ្យដឹងថា កាលពីថ្ងៃទី ២១ ខែមេសា ឆ្នាំ ២០២២ ខ្លួនពិតជាបានធ្វើសកម្មភាពសម្លាប់ទៅលើឈ្មោះ ខុម វ៉ាន់ឌី (ភេទទី៣) ពិតប្រាកដមែន ដោយសារតែជនរងគ្រោះមានទំនាក់ទំនងប្រុសផ្សេង ជាហេតុធ្វើឲ្យខ្លួនផ្ទុះការប្រចណ្ទ ហើយក៏យកខ្សែភ្លើងរិតកសម្លាប់។

ក្រោយពីធ្វើសកម្មភាពសម្លាប់រួចហើយ ខ្លួនបានយកទូរស័ព្ទ និងម៉ូតូមួយគ្រឿងម៉ាក សេ១២៥ ជិះគេចខ្លួនទៅស្រុកកំណើតនៅខេត្តកំពត រួចបន្តគេចទៅលាក់ខ្លួននៅខេត្តព្រះវិហារ ហើយក៏ត្រូវសមត្ថកិច្ចឃាត់ខ្លួនតែម្តង។

បច្ចុប្បន្ន ជនសង្ស័យ ត្រូវឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌមានជ័យ រង់ចាំកសាងសំណុំរឿងបញ្ចូនទៅតុលាការចាត់ការទៅតាមផ្លូវច្បាប់នៅពេលខាងមុខ។

គួររំលឹកផងដែរថា សាកសពជនរងគ្រោះ ត្រូវបានគេប្រទះឃើញដេកស្លាប់ក្នុងថ្លុកឈាមនៅក្នុងបន្ទប់ជួលមួយកន្លែង ស្ថិតតាមបណ្តោយផ្លូវបេតុង ក្នុងក្រុម ៥ ភូមិដំណាក់ធំ ២ សង្កាត់ស្ទឹងមានជ័យ ៣ ខណ្ឌមានជ័យ បង្កឲ្យមានការភ្ញាក់ផ្អើល កាលពីវេលាល្ងាចថ្ងៃទី ២៤ ខែមេសា ឆ្នាំ ២០២២ កន្លងទៅ៕

អត្ថបទ ៖ លីហេង