ប្រទះឃើញ​សាកសព​បុរសម្នាក់​ក្នុងព្រៃ​សមត្ថកិច្ច​ដាក់ការ​សង្ស័យ​ករណី​មនុស្សឃាត

សាកសព​បុរសម្នាក់​ត្រូវ​បានគេប្រទះ​ឃើញ​ដេកស្លាប់នៅ​ក្នុងព្រៃមួយ​កន្លែងនៅវេលាម៉ោង ១០៖៣០ នាទីយប់ថ្ងៃទី ២៨ ខែមេស ស្ថិតនៅចំណុចក្បែរដៃព្រែកក្នុងព្រៃកោងកាង ភូមិអុង ឃុំរាម ស្រុកព្រៃនប់ ខេត្តព្រះសីហនុ។

សមត្ថកិច្ចបាននិយាយថា បន្ទាប់ពីប្រទះឃើញសាកសពរួច ដោយសារតែពេលយប់ពិបាក​ក្នុងការ​ពិនិត្យ សមត្ថកិច្ចបានចងខ្សែហុំព័ទ្ធកន្លែងកើតហេតុរង់ចាំពិនិត្យនៅព្រឹកថ្ងៃទី ២៩ ខែមេសានេះ។

សមត្ថកិច្ចបានឲ្យដឹងថាសាកសព មានសភាពរលួយ មិនស្គាល់អត្តសញ្ញាណ ភេទប្រុស កំពស់ ​១.៧២ម៉ែត្រ ស្លៀកខោជើងវែងពណ៌ខ្មៅ សក់វែង ស្នាមសាក់ដើមដៃខាងឆ្វេង។ សាកសពមានស្លាកស្នាមរបួសប្រហោងខ្នង ប្រហោងក្បាលផ្នែកខាងក្រោយ។

បន្ទាប់ពីបានធ្វើកោសល្យវិច័យរួច ជំនាញកោសល្យវិច័យនគរបាលខេត្តព្រះសីហនុ បានសន្និដ្ឋាន​ថា​ជាករណីមនុស្ស​ឃាតគិតទុកជាមុន។

​បច្ចុប្បន្ន ក្រុមសមត្ថកិច្ចជំនាញ​កំពុងស្រាវជ្រាវរកជនសង្ស័យ​ រីឯសាកសពបាន​យកទៅរក្សា​ទុកនៅ​សាលតម្កល់សពនៅមន្ទីរពេទ្យបង្អែកខេត្តព្រះសីហនុ៕

អត្ថបទ៖ ស៊ុយ ចាន់ធា