ព័ត៌មានបន្ថែម ជុំវិញករណីបាញ់សម្លាប់បុរសម្នាក់ នៅចំណុចរង្វង់មូលតោពីរ ក្រុងព្រះសីហនុ

បុរសម្នាក់ ត្រូវគេបាញ់សម្លាប់នៅវេលាម៉ោង ១២ និង ៤០នាទី រំលងអធ្រាត្រ ឈានចូលថ្ងៃទី ១ ឧសភា ឆ្នាំ ២០២២ នៅត្រង់ចំណុចរង្វង់មូលតោពីរ ស្ថិតនៅក្នុងសង្កាត់លេខ ៤ ក្រុងព្រះសីហនុ ខេត្តព្រះសីហនុ ដោយ​ករណី ត្រូវបានគេអះអាងថា ផ្តើមចេញពីរឿងទំនាស់ប៉ះសម្តីគ្នា បន្តិចបន្តួចប៉ុណ្ណោះ។

បើយោងតាមប្រភពព័ត៌មាន ពីមិត្តភក្ដិជនរងគ្រោះ បានឲ្យដឹងថា នៅមុនពេលកើតហេតុ ខ្លួន និងមិត្តភក្ដិ បាន​ជិះម៉ូតូចេញពីកន្ទុយនាគ ត្រឡប់ទៅកាន់គេហដ្ឋានវិញ ខណៈពេលធ្វើដំណើរតាមបណ្តោយផ្លូវ​ ដល់ចំណុច​កើតហេតុ ស្រាប់តែជនបង្កបានជិះម៉ូតូមកក្បែររូចហើយ ស៊ីផ្លេខ្លាំងៗ ពេលនោះខ្លូន ក៏ស៊ីផ្លេតបទៅវិញ ស្រាប់តែជនបង្កខឹង ក្នុងស្ថានភាពស្រវឹងផងនោះ ក៏បានចុះមកវាយខ្លួន និងមិត្តភក្ដិ។

ក្នុងពេលនោះខ្លួន និងមិត្តភក្ដិ បន្ទាប់ពីត្រូវជនបង្កវាយហើយ ក៏បានលើកដៃសំពះសុំទោសជនបង្ក ព្រមទាំងសុំ​យកម៉ូតូជិះទៅផ្ទះវិញ តែជនបង្កមិនអស់ចិត្ត បានដកកាំភ្លើងចេញមក បាញ់ទៅលើមិត្តភក្ដិ (ជនរងគ្រោះ ) ចំ​ច្រមុះបណ្តាលឲ្យស្លាប់ភ្លាមៗ នៅនឹងកន្លែងកើតហេតុតែម្តង។ ប្រភពដដែល បានបន្តថា ជនបង្កបាន​ជិះម៉ូតូ​ម៉ាក ភី ស៊ី អ៊ិច ពណ៌ខ្មៅ មិនចាំស្លាកលេខ ស្លៀកពាក់អាវយឺតពណ៌ខ្មៅ ខោខ្លីពណ៌ខ្មៅ ស្ថិត​ក្នុងស្ថាន​ភាព​ស្រវឹ​ង​ជោគជាំ។ បន្ទាប់ពីកើតហេតុភ្លាមៗ ជនបង្កបានជិះម៉ូតូរត់គេចខ្លួនបាត់។

ក្រោយពេលកើតហេតុ កម្លាំងសមត្ថកិច្ចជំនាញប្រចាំក្រុងព្រះសីហនុ បានចុះមកដល់ទីតាំងកើតហេតុ ព្រម​ទាំងបានរុំព័ទ្ធខ្សែរប្រតិបត្តិការណ៍ និងស្រាវជ្រាវភ្លាមៗ នៅជុំវិញទីតាំងកើតហេតុ។ ចំណែក​សពជន​រង​គ្រោះ​ត្រូវបានក្រុមគ្រូពេទ្យវិចខ្ចប់ យកទៅរក្សាទុកជាបណ្តោះអាសន្ន នៅមន្ទីរពេទ្យបង្អែកខេត្ត​ចំការ​ចេក ដើម្បីរង់ចាំ​ក្រុ​មគ្រួសារ​ជនរងគ្រោះ មកទទួលយកទៅបូជាតាមប្រពៃណី៕

អត្ថបទ៖ កោះពស់