៤ ខែដើមឆ្នាំនេះ​ ករណី​អគ្គិភ័យកើតឡើង ១៨៣លើក ​បង្កឱ្យមនុស្សជិត​ ៣០ នាក់ ​ស្លាប់ និងរបួស​

នៅក្នុងរយៈពេល៤ខែ ដើមឆ្នាំ ២០២២​នេះ គ្រោះអគ្គិភ័យបានបណ្តាល​ឱ្យមនុស្សស្លាប់​ និងរងរបួស​ប្រមាណជិត៣០​នាក់ ខូចខាតផ្ទះសម្បែងជិត ៣០០ខ្នង និងឆេះឃ្លាំងទំនិញ តូបលក់ដូរ សាលារៀន ​និងអគាររដ្ឋបាលមួយចំនួនផងដែរ។

​លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ​បានមានប្រសាសន៍​នៅព្រឹកថ្ងៃទី ០៥ ​ខែឧសភានេះថា​ ចាប់ពីខែមករា រហូតមកដល់ខែមេសា ឆ្នាំ ២០២២​ នេះគ្រោះអគ្គិភ័យ​បានកើតឡើង​ចំនួន ១៨៣ លើកបណ្តាលឱ្យ​ខូចខាតផ្ទះសម្បែងចំនួន ២៣៩ខ្នង ឆេះតូបផ្សារ៤០តូប ឃ្លាំទំនិញ៩កន្លែង សាលារៀន២ខ្នង រោងចក្រសិប្បកម្មចំនួន៥កន្លែង អគាររដ្ឋបាល២ខ្នង។

ក្នុងចំណោមករណីអគ្គិភ័យ​ ១៨៣លើកនេះភាគច្រើនកើត​ឡើងនៅ​ក្នុងរាជនីភ្នំពេញមានចំនួន ៣៧លើកបណ្តាលឱ្យខូចខាតផ្ទះ៦៦ខ្នង ឃ្លាំងទំនិញ៤កន្លែង សា​លារៀន​១កន្លែង រោងចក្រ១កន្លែង ស្លាប់មនុស្ស១នាក់និងរងបួស១១នាក់។

បន្ទាប់មកខេត្តបាត់ដំបងមាន១៨លើក ខេត្តកំពង់ស្ពឺ១៣លើក​បានបណ្តាលឱ្យ​មនុស្សស្លាប់​ចំនួន​២នាក់ ខេត្តបន្ទាយមានជ័យ១៤លើកខេត្តកណ្តាលនិងខេត្តសៀមរាប១០ៗលើក ខេត្តស្វាយ​រៀង​៦លើកស្លាប់១នាក់ កំពង់ចាម៦លើកស្លាប់១នាក់។ចំណែកខេត្តកែបមិនមានករណីអគ្គិភ័យទេ។

លោក ឃុន សុខាបានបន្តទៀតថា តួលេខអគ្គិភ័យនេះបើធៀបទៅនឹងរយៈពេលដូចគ្នាឆ្នាំ២០២១ កន្លងទៅឃើញថាមានការថយចុះ។ ក្នុងនោះ៤ខែឆ្នាំ២០២១មានគ្រោះអគ្គិភ័យកើតឡើងចំនួន ៣១៧លើកបណ្តាលឱ្យខូចខាតផ្ទះចំនួន​៣៤៩ខ្នង ឆេះតូបចំនួន៩៨ខ្នង ឃ្លាំងទំនិញ២កន្លែងរោងចក្រសិប្បកម្ម ១៨កន្លែង អគាររដ្ឋបាល២ខ្នង និងបណ្តាល​ឱ្យមនុស្សស្លាប់ចំនួន៦នាក់និងរងរបួស១៩នាក់៕

អត្ថបទ៖ សំអឿន