សន្តិសុខសង្គម

ស្រវឹងស្រឿងៗ អួតថាកាប់មិនមុត មានអីសាកកាប់ចំក្បាល របួសធ្ងន់បញ្ជូនទៅមន្ទីរពេទ្យ

បានផុស

៣ years មុន

នៅ

ថ្ងៃសុក្រ ៦ ឧសភា ២០២២

ដោយ

អតីតកងកម្លាំងប្រដាប់អាវុធម្នាក់ ត្រូវបញ្ជូនទៅសង្គ្រោះនៅមន្ទីរពេទ្យបង្អែកខេត្ត ដោយសារតែគេបានអួតអាងក្នុងវង់ផឹកស៊ីថា ខ្លួនស្បែកស្វិត ហើយឲ្យមិត្តភក្ដិរួមតុកាប់សាកល្បង មានអីកាប់ភ្លឹបចំក្បាលរងរបួសធ្ងន់ បញ្ជូនទៅសង្គ្រោះភ្លាមៗ។ ករណីអួតអាងរឿងមន្តអាគមអូមអាមនេះ បានកើតឡើងកាលពីល្ងាចថ្ងៃទី ៤ ខែឧសភា ឆ្នាំ ២០២២ នៅចំណុចភូមិរូង ឃុំចែងមានជ័យ ស្រុកបាណន់ ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចមូលដ្ឋានមួយរូបបានបង្ហើបឲ្យដឹងថា នាល្ងាចកើតហេតុនោះ ជនរងគ្រោះឈ្មោះ ជា សារឿន អាយុ ៥៥ ឆ្នាំ ជាអតីតមន្ត្រីនគរបាល រស់នៅភូមិឃុំខាងលើ បានចូលរួមក្នុងវង់ផឹកស៊ីជាមួយមិត្តភក្ដិយ៉ាងសប្បាយខ្ញៀវខ្ញារ។ ប្រភពដដែលបានបន្តថា លុះដល់ពេលដែលស្រវឹងស្រឿងៗ ចាប់ផ្តើមអួតរឿងថាខ្លួនស្បែកស្វិតកាប់មិនមុត ហើយក៏សូត្របាលីអោយកាប់សាក ខណៈពេលនោះអ្នកផឹកស៊ីក្នុងវង់ម្នាក់ឈ្មោះ ហម ចាន់ អាយុ ៤៩ ឆ្នាំ ជាមន្ត្រីស៊ីម៉ាក់ កងអនុសេនា តូចគ្រឿងចក្រកម្ទេចមីន PDM2 បានយកកាំបិតកាប់សាកមើលស្វិត ឬមិនស្វិត រងរបួសក្បាលធ្ងន់ បញ្ជូនទៅសង្គ្រោះភ្លាមៗ នៅមន្ទីរពេទ្យខេត្តបាត់ដំបង។

សមត្ថកិច្ចមូលដ្ឋានបង្ហើបឲ្យដឹងថា មកទល់ល្ងាចថ្ងៃទី ០៥ ខែឧសភា ជនរងគ្រោះដែលឲ្យគេកាប់នោះ បានមកផ្ទះវិញហើយ ចំណែកជនសង្ស័យ ជាមន្ត្រីស៊ីម៉ាក អ្នកចិត្តសឿងទាញកាំបិតកាប់សាកនោះ មិនរត់ទៅណាទេ ដោយទំនងភាគីទាំងពីរ ជួបជជែកគ្នាឈានទៅព្រមព្រៀងសម្របសម្រួលគ្នា បញ្ចប់រឿងមិនប្តឹងផ្តល់ដោយសារជាមិត្តភក្ដិនឹងគ្នា៕

អត្ថបទ៖ សោ និយមរ័ត្ន

Related Topics:កាប់គ្នា