ឃាត់ខ្លួនក្រុមក្មេងស្ទាវបាន ៧៣ នាក់ ម៉ូតូ ២៨ គ្រឿង ដកហូតកាំបិតប័ុងតោ ដាវ ជាច្រើនដើម

កម្លាំងនគរបាល នៃអធិការដ្ឋាននគរបាលខណ្ឌសែនសុខ សហការជាមួយកម្លាំងប៉ុស្តិ៍នគរបាលរដ្ឋបាលភ្នំពេញថ្មី ចុះប្រតិបត្តិការបង្ក្រាបក្មេងស្ទាវបាន ៧៣ នាក់ ក្នុងនោះមានស្រី ២នាក់ ដកហូតបានម៉ូតូ ២៨គ្រឿង និងកាំបិតប័ុងតោ ដាវ ចំពាមកៅស៊ូច្រើនដើម ខណៈពួកគេប្រផ្តុំគ្នា។

ប្រតិបត្តិការនេះធ្វើឡើង នៅវេលាម៉ោង ១២ និង១០ រំលងអធ្រាត្រ ឈានចូលថ្ងៃទី៨ ខែឧសភា ឆ្នាំ២០២២ នៅចំណុចមុខដីឡូត៍មួយកន្លែងតាមបណ្តោយផ្លូវ ១៩៦៦ កែងនឹងផ្លូវ ១០០៣ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

សមត្ថកិច្ចបានប្រាប់ឱ្យដឹងថា ក្រោយពីឃាត់ខ្លួនក្មេងស្ទាវទាំងនោះបានភ្លាម សមត្ថកិច្ចបានធ្វើការរុករកនៅក្នុងដីព្រៃឡូត៍មួយកន្លែង ក៏បានប្រទះឃើញកាំបិតប័ុងតោ ដាវ និងជំពាមកៅស៊ូជាច្រើនដើម ត្រូវបានកម្លាំងសមត្ថកិច្ចដកហូតទុកជាវត្ថុតាង។

សមត្ថកិច្ចបានបន្តទៀតថា មុននឹងចុះបង្ក្រាបក្មេងស្ទាវខាងលើនេះ កម្លាំងនគរបាល នៃអធិការដ្ឋាននគរបាលខណ្ឌសែនសុខ បានសហការជាមួយកម្លាំងប៉ុស្តិ៍នគរបាលរដ្ឋបាលភ្នំពេញថ្មី ល្បាតក្នុងមូលដ្ឋាន ក៏ប្រទះឃើញក្មេងស្ទាវខាងលើកំពុងតែប្រមូលផ្ដុំគ្នា។ ដោយមានការសង្ស័យ សមត្ថកិច្ចក៏បានឃាត់ខ្លួនភ្លាមតែម្តង។

បច្ចុប្បន្នក្មេងស្ទាវទាំង ៧៣ នាក់ ម៉ូតូ ២៨គ្រឿង រួមនឹងវត្ថុតាងត្រូវបានកម្លាំងសមត្ថកិច្ចបញ្ជូនមកអធិការដ្ឋាននគរបាលខណ្ឌសែនសុខ ដើម្បីធ្វើការសួរនាំនិងស្រាវជ្រាវបន្ត៕

អត្ថបទ៖ សុខា