សន្តិសុខសង្គម

ព្រះសង្ឃ និងពុទ្ធបរិស័ទ ៥២ នាក់ បញ្ជូនទៅមន្ទីរពេទ្យ ក្រោយហូបបាញ់ហយ

បានផុស

២ years មុន

នៅ

ថ្ងៃអង្គារ ៣១ ឧសភា ២០២២

ដោយ

ព្រះសង្ឃ និងពុទ្ធបរិស័ទ ចំណុះជើងវត្ត ៥២ អង្គ/នាក់ ត្រូវបានក្រុមគ្រូពេទ្យធ្វើការសង្គ្រោះបន្ទាន់ ក្រោយពីបានពុលចំណីអាហារនៅក្នុងវត្ត នាថ្ងៃសីលម្សិលមិញនេះ។ ដោយនៅវេលាម៉ោង ១០ និង ៣០ នាទី ព្រឹក កាលពីថ្ងៃទី ៣០ ខែឧសភា ឆ្នាំ ២០២២ នៅចំណុចក្នុងបរិវេណវត្ត សំរោងលើ ក្នុងឃុំឆ្នាលមាន់ ស្រុកគាស់ក្រឡ ខេត្តបាត់ដំបង មានករណីពុលចំណីអាហារ ទាំងព្រះសង្ឃ ក៏ដូចជាឧបាសក ឧបាសិកា ចំណុះជើងវត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការរៀបរាប់ពីអ្នកជំងឺមួយចំនួន ដែលកំពុងសម្រាកព្យាបាលក្នុងមន្ទីរពេទ្យបង្អែកស្រុកមោងឫស្សី បាននិយាយថា កាលពីម្សិលមិញនេះ គឺជាថ្ងៃសីល ដូច្នេះហើយទើបពុទ្ធបរិស័ទចំណុះជើងវត្ត បានមូលមតិគ្នារៀបចំធ្វើបាញ់ហយ ដើម្បីប្រគេនព្រះសង្ឃឲ្យប្លែកមាត់ម្តង។

ប្រភពដដែលបានបន្តថា លុះក្រោយពីព្រះសង្ឃឆាន់រួច ពលរដ្ឋទាំងអស់ក៏បានចាប់ផ្តើមនាំគ្នាបរិភោគយ៉ាងឆ្ងាញ់ពិសា ប៉ុន្តែមិនបានប៉ុន្មាននាទីផង ទាំងព្រះសង្ឃក៏ដូចជាពុទ្ធបរិស័ទចាប់ផ្តើមមានអាការៈក្អួតចង្អោរ និងរាករូសឥតឈប់ឈរ ទើបអាជ្ញាធរចាត់រថយន្តដឹកបញ្ជូនទៅកាន់មន្ទីរពេទ្យបង្អែកស្រុកមោងឫស្សី ដើម្បីសង្គ្រោះ ដែលក្នុងនោះសរុបចំនួន ៥២ អង្គ នាក់ គឺព្រះសង្ឃ ៤ អង្គ ប្រជាពលរដ្ឋ ស្រីចំនួន ៣០ នាក់ និងប្រុស ១៨ នាក់ ។

បើតាមការអះអាងបឋមពីក្រុមគ្រូពេទ្យបានបញ្ជាក់ថា បញ្ហានេះគឺអាចបណ្តាលមកពីបន្លែឆៅ ដែលលាងមិនស្អាត ទើបបណ្តាលឲ្យមានការឆ្លងបាក់តេរី ទៅក្នុងខ្លួនមនុស្ស។ នៅព្រឹកថ្ងៃទី ៣១ នេះដែរ កម្លាំងការិយាល័យបច្ចេកទេស និងកោសល្យវិច័យ បានត្រៀមចុះទៅកាន់កន្លែងកើតហេតុហើយ ដើម្បីស្រាវជ្រាវ និងសិក្សាលើបញ្ហានេះថា តើដើមចម គឺបណ្ដាលមកពីអ្វី៕