ឆ្លងចរន្តអគ្គិសនី ឆេះភោជនីយដ្ឋានគ្រឿងសមុទ្រ អ៊ូហ៊ូសឺហាយ នៅខណ្ឌចំការមន

ភោជនីយដ្ឋានគ្រឿងសមុទ្រ ​អ៊ូហ៊ូសឺហាយ ​ត្រូវបានភ្លើងឆេះបំផ្លាញសម្ភារៈមួយចំនួន​ កាលពីវេលា​ម៉ោង ៦ និង ៤០ នាទីព្រឹក ថ្ងៃទី០៦ ខែមិថុនា ឆ្នាំ២០២២ នៅចំណុចផ្លូវសបិត ភូមិ ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

របាយការណ៍របស់សមត្ថកិច្ចបានឲ្យដឹងថា ហេតុការណ៍អគ្គិភ័យឆាបឆេះនេះបណ្តាលមក​ពីការឆ្លង​ចរន្តអគ្គិសនី ធ្វើឲ្យខូចខាតឆេះសម្ភារម៉ាស៊ីនត្រជាក់ចំនួន ១គ្រឿង និងពុំបានឆេះរាលដាលដល់ផ្ទះអ្នកជិតខាងឡើយ។ ទីតាំងខាងលើ ជាប្រភេទសំណង់ថ្មបេតុង ដែលមានទំហំ ១២ម៉ែត្រ x ១៨ម៉ែត្រ។

កម្លាំងសមត្ថកិច្ចជំនាញបានបន្តថា ករណីអគ្គិភ័យខាងលើនេះ ត្រូវបានអន្តរាគមន៍បាញ់​ឲ្យរលត់​នៅវេលាម៉ោង ៧ ព្រឹកថ្ងៃខែឆ្នាំដដែល ដោយប្រើប្រាស់រថយន្តការិយាល័យ​អគ្គិភ័យ រាជធានីភ្នំពេញចំនួន ៣គ្រឿង ពុំបានប្រើប្រាស់ទឹក និងរថយន្តជំនួយមកពីក្រុមហ៊ុន OCIC កោះពេជ្រចំនួន ៣គ្រឿងពុំបានប្រើប្រាស់ទឹក៕