ភ្លៀងធំមួយមេ​បង្កឲ្យអ្នករស់​នៅតំបន់បឹងព្រលឹត​ត្រូវរងការលិចលង់​មិនធ្លាប់មាន

ភ្លៀងធំមួយមេធំនៅថ្ងៃទី ១០ ​ខែមិថុនាម្សិលមិញ បានបង្កឲ្យមានការលិចលង់​តំបន់បឹងព្រលឹត ​ស្ថិតក្នុង​ភូមិ​អូរអណ្តូង​សង្កាត់ព្រែកប្រា ខណ្ឌច្បារ​អំពៅ​ រាជធានីភ្នំពេញ​ដែលពុំធ្លាប់​​មានអស់រយៈពេលជាង​១០ឆ្នាំមកហើយនោះ។

បងប្អូនប្រជាពលរដ្ឋបាននិយាយថាជារៀងរាល់ដងភ្លៀងធ្លាក់ខ្លាំងហើយលិចលង់ប្រមាណជា៥ម៉ោងទឹកក៏បានស្រកចុះប៉ុន្តែចម្លែកភ្លៀងធ្លាក់នៅថ្ងៃទី ១០ ខែមិថុនានេះបែជាលិចលង់ស្មើនឹងត្រឹមចង្កេះបង្កឲ្យប៉ះពាល់ដល់យាន្តជំនិះរបស់ប្រជាពលរដ្ឋទៀតផង។

លោកស្រី សេត ម៉ូនីតា ប្រធានភូមិអូរអណ្តូង១ សង្កាត់​ព្រែកប្រាបាន​បង្ហោះនៅលើបណ្តាញហ្វេសប៊ុកថា ភូមិរបស់លោកស្រីបានរងការលិចលង់ហើយ សូមបងប្អូន​ប្រជាពលរដ្ឋមេត្តាប្រុងប្រយត្ន័ផងហើយក្នុងនោះលោកស្រីមេភូមិបានធ្វើសេចក្តីរាយការណ៍សុំកិច្ចអន្តរាគមន៍ដល់សាលាខណ្ឌច្បារអំពៅឲ្យនាំយកម៉ាសុីនបូមទឹកមកដាក់បូមរំដោះទឹកចេញពីតំបន់បឹងព្រលឹតនេះ។

ទាក់ទិនទៅនឹងការលិចលង់នេះលោក គុយ គឹមហ៊ាង ប្រធានការិយាល័យសាធារណការ​សាលា​ខណ្ឌច្បារអំពៅបានឲ្យដឹងនៅព្រឹកថ្ងៃទី ១១ ខែមិថុនានេះថា ពេលនេះលោក ចេង មុនីរ៉ា អភិបាល​នៃគណអភិបាលខណ្ឌច្បារអំពៅកំពុងដឹកនាំក្រុមជំនាញឲ្យនាំយកម៉ាស៊ីនបូមទឹកទៅបូមហើយ។

ដោយឡែកបងប្អូនប្រជាពលរដ្ឋដែលរងការលិចលង់ផ្ទះសំបែងកំពុងខ្វាយខ្វល់នឹងម៉ូតូរបស់ពួកគាត់ត្រូវរលត់ដោយសារចូលទឹកហើយជាងជួសម៉ូតូនៅតំបន់បឹងព្រលឹតនេះក៏សប្បាយនឹងប្រមូលលុយព្រោះម៉ូតូ១គ្រឿងអាចចំណាយមិនក្រោម៣ម៉ឺនរៀលព្រោះភាគច្រើនប្តូប្រេងម៉ាស៊ីនដែលចូលទឹក៕

អត្ថបទ៖ នរា