អ្នកនាំពាក្យ​បញ្ជាក់​ព័ត៌មានមិនពិតថា ​សមត្ថកិច្ច​ផាកពិន័យម៉ូតូ​យានយន្ត​ដែលមានឆ្កូត ​ឬប្រឡាក់ផ្លាកលេខ

លោក ហ៊ាង សុទ្ធាយុត្តិ ​អ្នកនាំពាក្យក្រសួងសាធារណការ និងដឹកជញ្ជូន នៅថ្ងៃទី ១៤ ខែមិថុនា ២០២២​ បានបញ្ជាក់​បកស្រាយ​ចំពោះការយល់ច្រឡំជុំវិញការផាកពិន័យទៅលើផ្លាកលេខម៉ូតូ យានយន្ត ឆ្កូត ឬប្រឡាក់។ ​

លោកបញ្ជាក់ថា ចំពោះ​យាន្តយន្តរបស់បងប្អូនប្រជាពលរដ្ឋ​ដែលមានផ្លាកលេខ​គ្រាន់តែ​មានការឆ្កូត កកិត ឬមានសភាពរលុបតិចតូចនោះមិន​តម្រូវឲ្យមានការផាកពិន័យ​នោះឡើយ លុះត្រាតែមាន​ការ​បាក់ របូតចេញពីយាន្តយន្ត ឬមិនអាចមើលដឹង​ពីទម្រង់ដើម​ទើបតម្រូវឲ្យមានការផ្លាស់ប្តូរ។

ការបញ្ជាក់បែបនេះ បន្ទាប់ពីមានអ្នកលេងបណ្ដាញសង្គម​មួយចំនួនបាន​ផ្សព្វផ្សាយថា សមត្ថកិច្ចនឹង​ផាកពិន័យចំពោះយានយន្តណាដែលពាក់ផ្លាកមានស្នាមប្រឡាក់ ឆ្កូត។​

​លោក ហ៊ាង សុទ្ធាយុត្តិបន្ថែមថា ចំពោះផ្លាកលេខដែលមានការ ឆ្កូត កកិត​ រលុបបន្តិចបន្ទួច​តែងតែ​កើត​មាន ទាំងមន្ត្រីនគបាល ក៏ដូចជាបងប្អូនប្រជាពលរដ្ឋ ប៉ុន្តែគឺមិនមានគោលការណ៍​ណាមួយ​ដែលតម្រូវឲ្យផាកពិន័យឬ ដោះដូរចេញនោះទេ ហើយវាក៏មិនមែនជាការពិតដែរ។

ចំពោះផ្លាកលេខដែលត្រូវដោះដូរចេញលុះត្រា តែមានសភាពផ្លាកលេខយានជំនិះបាក់ រហែក រលុបអក្សររបូតចេញពីយានយន្ត។

តាមមាត្រា ៦-៧ នៃច្បាប់ស្ដីពីចរាចរណ៍ផ្លូវគោក បានកំណត់ការពិន័យអន្តការណ៍លើម៉ូត ឬរ៉ុម៉ក(កង់៣ ឬកង់៤) ត្រូវពិន័យ ១២ ម៉ឺនរៀល ក្នុងករណីប្រើផ្លាកសម្គាល់ដោយរលុបលេខ បាត់លេខ ដាក់សម្ភារ ឬវត្ថុផ្សេងៗបាំង ចំណែកឯរថយន្តធុនស្រាល ចំនួន ១៨ ម៉ឺនរៀល ខណៈរថយន្តធុនធ្ងន់ចំនួន ៣៧ ម៉ឺន ៥ ពាន់រៀល៕

មន្ត្រីអ្នកនាំពាក្យក្រសួងសាធារណការ​ដដែលរូបនេះ ក៏សម្ដែងការ​សោកស្តាយចំពោះបងប្អូន​ដែលយកទៅផ្សាយ​ព័ត៌មានមិនពិតធ្វើឲ្យមានការភាន់ច្រឡំ។

ម្យ៉ាងទៀតទៀតចំពោះបងប្អូនប្រជាពលរដ្ឋ​ដែល​មានផ្លាកលេខឆ្កូតខូចលេខបន្តិចបន្តួចមិន​គួរយក​ជក់ ឬទឹកថ្នាំមកសរសេរដើម្បីបិត​បាំងព្រោះវាមិន​ត្រឹមត្រូវទេ ខុសពីសណ្ឋានដើម និងខុសពីគោល​ការណ៍​ក្នុងករណីក្លែងបន្លំនោះសមត្ថកិច្ចនឹង​ចាត់វិធានការទៅតាមច្បាប់ផងដែរ៕

អត្ថបទ៖ ឌឿនចាន់ ថារី