សន្តិសុខសង្គម

បុរសម្នាក់សង្ស័យញៀនថ្នាំ ដុតផ្ទះខ្លួនឯង បណ្ដាលឲ្យឆាបឆេះ៣៧ខ្នង

បានផុស

៣ years មុន

នៅ

ថ្ងៃចន្ទ ២០ មិថុនា ២០២២

ដោយ

ភ្នំពេញ ៖ បុរសម្នាក់សង្ស័យញៀនថ្នាំ បានដុតផ្ទះខ្លួនឯងចោល បណ្ដាលឲ្យឆាបឆេះដល់ផ្ទះអ្នកជិតខាង៣៧ខ្នងផ្សេងទៀត សំណាងល្អមិនបណ្ដាលឲ្យមានមនុស្សរបួស និងស្លាប់។ បុរសដែលញៀនថ្នាំ ដុតខ្លួនឯងនេះ ត្រូវបានគេស្គាល់ថាមានឈ្មោះ លឹម ភារុណ ភេទប្រុស អាយុ៤២ឆ្នាំ មុខរបរមិនពិតប្រាកដ រស់នៅចំណុច ភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

បើយោងតាមប្រភពពីលោក យ៉ិន វុធ ចៅសង្កាត់ច្បារអំពៅទី២ បានឲ្យកម្ពុជាថ្មីដឹងថា នៅវេលាម៉ោង១៦រសៀល ថ្ងៃទី២០ ខែមិថុនានេះ នៅចំណុចភូមិដើមចាន់សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ មានអគ្គិភ័យកើតឡើងបណ្តាលឲ្យឆេះផ្ទះប្រជាពលរដ្ឋអស់ចំនួន៣៧ខ្នងភាគច្រើនជាផ្ទះឈើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យ៉ិន វុធ បានបន្តថា ករណីអគ្គិភ័យនេះបានរលត់ទៅវិញនាវេលាម៉ោង១៧នឹង៥០នាទីរសៀលថ្ងៃដដែល ដោយបំផ្លាញទ្រព្យសម្បតិក្នុងផ្ទះអស់គ្មានសល់ ប៉ុន្តែពុំមានគ្រោះថ្នាក់ដល់អាយុជីវិតប្រជាពលរដ្ឋណាម្នាក់ឡើយ។ ហើយក្នុងនោះមានរថយន្តពន្លត់អគ្គីភ័យប្រមាណ១០គ្រឿង បានមកជួយបាញ់ពន្លត់បានទាន់ពេល។

គួរបញ្ជាក់ថា ទីតាំងដែលរងការឆេះបំផ្លាញនេះគឺបានរងគ្រោះចំនួន២លើកទាំងថ្ងៃនេះ។ ខណៈលើកទី១កើតឡើងក្នុងអំឡុងឆ្នាំ២០១៦ដែលកាលណោះបំផ្លាញផ្ទះប្រជាពលរដ្ឋទាំងកណ្តាលយប់អស់ប្រមាណជា៣០០ខ្នង បណ្តាលឲ្យមនុស្សម្នាក់ស្លាប់ទៀតផង៕

ដោយ ៖ នរា