ឆក់​យក​ជីវិត​ពីរនាក់បងប្អូន ពេល​ទៅ​លេង​ស្រះកាយយកអាចម៍ដីនៅវាលស្រែ

ឪពុកម្តាយស្លុតចិត្តស្ទើរបាត់បង់ស្មារតី ខណះកូនស្រីអាយុ ១២ ឆ្នាំ និងកូនប្រុសអាយុ ១០ ឆ្នាំជាប្អូន បានចាកចេញពីក្រុម​គ្រួសារដោយគ្មានពេលត្រឡប់វិញ​ទាំងកំពុងសិក្សា ដោយសារតែចុះលេងទឹកស្រះដែលគេជីកយកអាចម៌ដីលក់ នៅកណ្តាលស្រែ ស្ថិត​ក្បែរភូមិ១កន្លែងបានឆក់យកជីវិត។

សមត្ថកិច្ចមូលដ្ឋានបានប្រាប់ថា ករណីខាងលើបានកើតឡើងនៅថ្ងៃទី ២៨ ខែមិថុនា ឆ្នាំ២០២២ នៅវេលាម៉ោង ០៧​និង​២០ នាទីយប់ ស្ថិតនៅចំណុចក្រុមទី០១ ភូមិស្រះកែវ ឃុំកំពង់ព្រះ ស្រុកសង្កែ ខេត្តបាត់ដំបង ស្របពេលឪពុកម្តាយនៅកន្លែងរោងលក់ដូរនៅមាត់ផ្លូវមុខផ្ទះ ហើយកូនប្រុសស្រីទាំង ២ នាក់នាំគ្នាទៅវាលស្រែ ហើយនាំគ្នាចុះងួតទឹកក្នុងស្រះស្មានតែរាក់ក៏លង់ស្លាប់ទាំងពីរនាក់បងប្អូនតែម្តង។

សមត្ថកិច្ចបន្តថា ក្មេងរងគ្រោះទាំងពីរនាក់មានឈ្មោះ ចាន់ ចាវមាន ភេទស្រី អាយុ១២ឆ្នាំ មុខរបរសិស្ស និងឈ្មោះ ចាន់ ចននី ភេទប្រុស អាយុ១០ឆ្នាំ មុខរបរសិស្ស អ្នកទាំងពីរត្រូវជាបងប្អូនបង្កើតនឹងគ្នា។

សមត្ថកិច្ចបន្តថា កន្លែងកើតហេតុគឺជាស្រះទឹកដ៏ធំមួយនិងមានជម្រៅប្រហែលពី ៤ ទៅ ៦ម៉ែត្រ ស្ថិត​នៅ​ចម្ងាយពីផ្ទះក្មេង​រងគ្រោះប្រហែលជា ២០០ម៉ែត្រ។ ដោយមូលហេតុក្មេងទាំងពីរទៅលេងនៅវាលស្រែ ហើយក៏នាំគ្នាចុះលេងទឹកក៏លង់តែម្តង ខណះដែលឪពុកម្តាយបាត់អត់ឃើញកូននៅផ្ទះក៏នាំគ្នាទៅរកនៅវាលស្រែក៏ប្រទះឃើញសាកសពកូនអណ្តែតក្នុងស្រះទាំងពីរនាក់នៅវេលាខាងលើតែម្តង។

ក្រោយមានការឆោឡោពីឪពុកម្តាយ បានភ្ញាក់ផ្អើលដល់អ្នកភូមិ ហើយសមត្ថកិច្ចក៏បានចុះទៅពិនិត្យនៅកន្លែងកើតហេតុនិង ពិនិត្យសាកសពក្មេងទាំងពីរនាក់សមត្ថកិច្ចបានសន្និដ្ឋានថា ក្មេងរងគ្រោះទាំងពីរនាក់ពិតជាបានស្លាប់ដោយចុះងួតទឹកខ្លួនឯងយ៉ាងពិតប្រាកដ ហើយក៏បានប្រគល់ឲ្យឪពុកម្តាយយកទៅធ្វើបុណ្យតាមប្រពៃណី៕

អត្ថបទ៖ សៅ សារិទ្ធ