កូនបំណុលចាក់សម្លាប់ម្ចាស់បំណុល២ដែកឆាប​ពេលជនរងគ្រោះទៅទារលុយ

បុរសវ័យជាង៤០ឆ្នាំម្នាក់ ដែលគេដឹងថាជាម្ចាស់បំណុលរបស់ជនដៃដល់ ត្រូវបានស្លាប់ពេល​បញ្ជូនដល់មន្ទីរពេទ្យ បន្ទាប់ពីទៅទារលុយ​ពីជនដៃដល់ដែលជំពាក់​ចំនួន២០០ដុល្លារ តែបែជាផ្ទុះ​ទំនាស់ពាក្យសម្ដី រហូតឈានដល់យកដែកឆាបមកចាក់ចំពីរកន្លែងនៅលើដើមទ្រូង។

ករណីហិង្សារហូតមានអ្នកស្លាប់នេះ បានកើតឡើងកាលពីវេលាម៉ោង១០យប់ ថ្ងៃទី៦ ខែកក្កដា ឆ្នាំ២០២២ នៅចំណុចផ្សារសហគមន៍បុរីកីឡា ក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។

តាមប្រភពពីប្រជាពលរដ្ឋបានប្រាប់ឱ្យដឹងថា បុរសរងគ្រោះមានវ័យជាង៤០ឆ្នាំ រីឯជនបង្កមានវ័យ​ជាង២០ឆ្នាំ អ្នកទាំងពីរជាអ្នកស្គាល់គ្នា និងរស់នៅកន្លែងកើតហេតុ តែអគារខុសគ្នា ។

ប្រភពដដែលបានឱ្យដឹងទៀតថា មុនពេលកើតហេតុ គេឃើញបុរសរង​គ្រោះបានដើរទៅទារលុយ​ពីជនដៃដល់ តែជនដៃដល់មិនមានលុយទើបមានការឈ្លោះប្រកែកគ្នា និងប្រតាយ​ប្រតប់គ្នាមួយ​ប្រាវ ធ្វើឱ្យកូនបំណុលទាញដែកឆាបចាក់ទៅលើជនរងគ្រោះចំដើមទ្រូងពីរកន្លែង បណ្ដាលឱ្យរង​របួសធ្ងន់ធ្ងរ ហើយភ្លាមៗនោះជនបង្កក៏គេចខ្លួនបាត់ស្រមោលទៅ។  

បន្តាប់ពីកើតហេតុ ប្រជាពលរដ្ឋដែលរស់នៅជិតខាងបានទាក់ទងទៅសមត្ថកិច្ចមូលដ្ឋាន និងរថយន្តសង្គ្រោះបន្ទាន់ឱ្យមកដឹកជនរងគ្រោះទៅកាន់មន្ទីរពេទ្យដើម្បីសង្គ្រោះជីវិត តែអកុសលជនរងគ្រោះបានដាច់ខ្យល់ស្លាប់ពេលបញ្ជូនទៅដល់មន្ទីរពេទ្យ៕

អត្ថបទ៖ សុខុម