បុរសវ័យចំណាស់ម្នាក់លង់ទឹកស្រះស្លាប់ ខណៈត្រឡប់ពីចម្ការ

បុរសវ័យចំណាស់ម្នាក់ស្លាប់យ៉ាងអណោចអធម៌ ពេលត្រឡប់ពីចម្ការចុះងូតទឹកស្រះបានលង់ទឹក។ រឿងរាងនេះកើតឡើងនៅវេលាម៉ោង៥និង៣០នាទីល្ងាច ថ្ងៃទី១៤ ខែកក្កដា ឆ្នាំ២០២២ នៅចំណុច ស្រះធំខាងជើងភូមិវត្តចាស់ ចម្ងាយប្រហែល៥០០ម៉ែត្រ ភូមិវត្តចាស់ ឃុំថ្មពួកស្រុកថ្មពួក ខេត្តបន្ទាយមានជ័យ។

លោកវរសេនីយ៍ទោ ឈឿន គឹមឈុន អធិការនគរបាលស្រុកថ្មពួក បានប្រាប់ឲ្យដឹងថា ជនរងគ្រោះមានឈ្មោះ ឃិត ស្រឹម ភេទប្រុសអាយុ៥៩ឆ្នាំ រស់នៅភូមិវត្តចាស់ ឃុំថ្មពួក ស្រុកថ្មពួក ខេត្តបន្ទាយមានជ័យ ។ លោកវរសេនីយ៍ទោ ឈឿន គឹមឈុន បានបញ្ជាក់ថា មុនពេលកើតហេតុតាមការឲ្យដឹងពីឈ្មោះ មី សោន ភេទស្រី អាយុ៦០ឆ្នាំ រស់នៅភូមិជាមួយគ្នាបានរៀបរាប់ថា ជនរងគ្រោះនិងគាត់បានត្រឡប់មកពីចម្ការវិញ បាននាំគ្នាចុះងូតទឹកស្រះ ពេលកំពុងដុសលាងខ្លួនស្រាប់តែបាត់ជនរងគ្រោះ ពេលនោះគាត់ខំរកជុំវិញស្រះ ស្រាប់តែប្រទះឃើញស្បែកជើងរបស់ជនរងគ្រោះអណ្ដែតក្នុងទឹកស្រះ គាត់ក៏រាវក្នុងទឹតអស់ចិត្ត​ នៅតែមិនឃើញជនរងគ្រោះ គាត់ក៏បានរត់ទៅហៅអ្នកភូមិឲ្យទៅជួយរករហូតដល់ម៉ោង៦និង១៣នាទីយប់ ទើបរកសពជនរងគ្រោះឃើញ និងស្រង់យកមកដាក់លើគោក។

លោកវរសេនីយ៍ទោ ឈឿន គឹមឈុន បានបញ្ជាក់បន្ថែមទៀតថា ក្រោយពីកើតហេតុហើយសមត្ថកិច្ចចម្រុះបានចុះដល់កន្លែងកើតហេតុ​បង្កើតគណៈកម្មការធ្វើការពិនិត្យសពពុំឃើញ​មានស្លាកស្នាមអ្វីដែលពាក់ព័ន្ធលើករណីឃាតកម្មទេ បើយោងតាមការសន្និដ្ឋានរបស់គ្រូពេទ្យជនរងគ្រោះពិតជាស្លាប់ដោយសារលង់ទឹកប្រាកដមែន សពបានប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕

អត្ថបទ៖ វ៉ាន់ ណាង