សន្តិសុខសង្គម

ឆ្មក់បង្ក្រាបស្តុកបារី និងស្រា ខុសច្បាប់ ២ កន្លែង លួចនាំចេញទៅថៃ

បានផុស

៣ years មុន

នៅ

ថ្ងៃអង្គារ ១៩ កក្កដា ២០២២

ដោយ

ទីតាំងល្មើសច្បាប់ ២ កន្លែង ដែលសំងំស្តុកទំនិញខុសច្បាប់រាប់ឆ្នាំ លួចលាក់ឆ្លងដែនទៅកាន់ប្រទេសថៃ ត្រូវកម្លាំងប៉ូលិសសេដ្ឋកិច្ច ដឹកនាំដោយតំណាងអយ្យការចុះបង្ក្រាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រតិបត្តិការនេះ បានធ្វើឡើងកាលពីថ្ងៃទី ១៨ ខែកក្កដា ឆ្នាំ ២០២២ ដែលមានការដឹកនាំដោយលោក ក្រឡាបញ្ជី គឹម ប៊ុនធឿន និងអមដំណើរដោយលោក យី យក់សាន នាយការិយាល័យប៉ូលិសបង្ក្រាបបទល្មើសសេដ្ឋកិច្ច និងមានការសហការពីមន្ត្រីនគរបាលស្រុកផងដែរ។

ការចុះឆែកឃ្លាំង ដែលសង្ស័យថាមានស្តុក ស្រា បារី សម្រាប់នាំចូលប្រទេសថៃ គឺបានធ្វើឡើងលើ ២ ទីតាំងផ្សេងគ្នាក្នុងពេលតែមួយ គឺទី ១ ស្ថិតនៅតាមបណ្តោយផ្លូវលេខ ៥៩ ចូលទៅកាន់ច្រកទ្វារអន្តរជាតិគីឡូ ១៣ (ភ្នំដី)ស្ថិតក្នុងភូមិគីឡូ ១៣ ឃុំសន្តិភាព ស្រុកសំពៅលូន ដែលជាកម្មសិទ្ធរបស់ឈ្មោះ សិដ្ឋ និងទី ២ តាមបណ្តោយផ្លូវលេខ ៥៧ ស្ថិតក្នុងភូមិគីឡូ ១៣ ឃុំសន្តិភាព ស្រុកសំពៅលូន ជាកម្មសិទ្ធរបស់អ្នកស្រី វី ។

សុំបញ្ជាក់ថាទីតាំងចំនួន ២ ខាងលើ ដែលកម្លាំងសមត្ថកិច្ចសហការធ្វើការត្រួតពិនិត្យនោះ គឺជាទីតាំងដែលសមត្ថកិច្ចសង្ស័យថា មានការស្តុកនូវទំនិញខុសច្បាប់ដូចជាស្រាបារី សម្រាប់ធ្វើការនាំឆ្លងដែនចូលទៅប្រទេសថៃដោយខុសច្បាប់។

ជួបជាមួយកម្ពុជាថ្មី តាមរយៈទូរស័ព្ទ អ្នកស្រី វី បានទទួលស្គាល់ថា ទំនិញរបស់អ្នកស្រីពិតជាមានមួយចំនួនខុសច្បាប់ពិតប្រាកដ។ ដោយឡែកលោក យី យក់សាន នាយការិយាល័យប្រឆាំងបទល្មើសសេដ្ឋកិច្ច ក៏បានបញ្ជាក់ផងដែរថា លោកមិនទាន់កំណត់ជារបាយការណ៍ឲ្យបានច្បាស់លាស់នៅឡើយទេអំពីទំនិញដែលខុសច្បាប់ ដោយសារតែទំនិញមានច្រើន ហើយកម្លាំងរបស់លោកកំពុងពិនិត្យ ៕

អត្ថបទ៖ សោ និយមរ័ត្ន