៦ខែឆ្នាំនេះ គ្រោះអគ្គិភ័យកើតឡើង២៥១​លើក សម្លាប់មនុស្ស១១នាក់ និងបំផ្លាញផ្ទះជាង៤០០ខ្នង

នៅក្នុងរយៈពេល៦ខែឆ្នាំ២០២២នេះ គ្រោះអគ្គិភ័យបានកើតឡើងចំនួន២៥១លើកនៅទូទាំងប្រទេស បណ្តាលឱ្យមនុស្សស្លាប់១១នាក់ និងរងរបួស៣២នាក់ ព្រមទាំងបំផ្លាញផ្ទះសម្បែងប្រជាពលរដ្ឋប្រមាណ៤៤៥ខ្នងល្វែង។

យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ក្រៅពីនេះគ្រោះអគ្គិភ័យបានបណ្តាលឱ្យខូចខាតតូបលក់ដូរចំនួន៤៦តូប ឆេះឃ្លាំងទំនិញចំនួន១៣កន្លែង ឆេះរោងចក្រនិងសិប្បកម្មចំនួន៦កន្លែង
អគាររដ្ឋបាល២កន្លែង សាលារៀន២ខ្នងឆេះខូចខាតស្រូវជង្រុក១៣តោនគ្រាប់ពោត២០តោន រថយន្ត២០គ្រឿង
ម៉ូតូ៨៣គ្រឿងនិងចំការស្វាយចន្ទីចំនួន៦ហិកតា។

តួលេខគ្រោះអគ្គិភ័យនេះ បើប្រៀបធៀបទៅនឹងរយៈពេល៦ខែដូចគ្នាកាលពីឆ្នាំ២០២១និង២០២០កន្លងទៅឃើញថា មានការថយចុះតែករណីស្លាប់និងរបួសមានចំនួនប្រហាក់ប្រហែលគ្នា។ រយៈពេល៦ខែដើមឆ្នាំ២០២១មានគ្រោះអគ្គិភ័យកើតឡើងចំនួន២៨៨លើកនៅទូទាំងប្រទេសបណ្តាលឱ្យមនុស្សស្លាប់ចំនួន១៤នាក់និងរបួសចំនួន២៩នាក់ព្រមទាំង​ខូចខាតផ្ទះសម្បែងចំនួន៣២១ខ្នងខូចខាតតូបផ្សារចំនួន៨០តូបឃ្លាំងទំនិញចំនួន១១កន្លែង រោងចក្រនិងសិប្បកម្មចំនួន១១កន្លែងនិងអគាររដ្ឋបាលចំនួន១៧កន្លែង។ ចំណែក៦ខែឆ្នាំ២០២០មានគ្រោះអគ្គិភ័យបានកើតឡើងចំនួន​ង​៤០៦លើកបណ្តាលឱ្យស្លាប់មនុស្សចំនួន១៣នាក់និងរងរបួសចំនួន២៤នាក់ខូចខាតលំនៅដ្ឋានចំនួន៤៤៦ខ្នង តូបផ្សារចំនួន១០០តូប ឃ្លាំងទំនិញចំនួន៥កន្លែង រោងចក្រសិល្បកម្មចំនួន២១កន្លែង និងអគាររដ្ឋបាលចំនួន៨កន្លែង ៕

អត្ថបទ៖ សំអឿន