អាជ្ញាធរ​ខណ្ឌច្បារអំពៅ​ចាប់ផ្តើម​ជីកប្រឡាយ​រំដោះទឹក​បញ្ចៀសការលិចលង់

លោក ចេង មុនីរ៉ា​ អភិបាលខណ្ឌច្បារអំពៅ​បានប្រកាសជូនដំណឹងដល់​បងប្អូនរស់នៅ​អមសង្ខាង​ប្រឡាយនានា​ក្នុងសង្កាត់ព្រែកប្រា​ និងសង្កាត់ព្រែកថ្មី​ ខណ្ឌច្បារអំពៅ រាជធានីភ្នំពេញ​សូមចូលរួម​សហការណ៍ជាមួយអាជ្ញាធរ ព្រមទាំងក្រុមជំនាញដើម្បីដំណើរការស្តាប្រឡាយទឹក​ក្នុងបំណង​រំដោះ​ទឹកចេញពីតំបន់ដែលរងការលិចល់លំនៅដ្ឋានដីអាស្រ័យ​ផលនាបច្ចុប្បន្ននេះ។

​យោងតាមការអះអាងពីលោក គុយ គឹមហ៊ាង ប្រធានការិយាល័យសាធារណ​ការសាលាខណ្ឌ​ច្បារ​អំពៅបានប្រាប់កម្ពុជាថ្មីនាព្រឹកថ្ងៃទី ២៥ ខែកក្កដានេះថា ចាប់ពីថ្ងៃទី ២៧ ខែកក្កដាខាងមុខនេះលោក ចេង មុនីរ៉ា អភិបាលខណ្ឌច្បារអំពៅបានសម្រេចដាក់គ្រឿងចក្រអេស្កាវ៉ាទ័រចុះកាយប្រឡាយបង្ហូទឹក ដើម្បីរំដោះទឹកចេញពីតំបន់ដែលរងការលិចលង់លំនៅដ្ឋានប្រជាពលរដ្ឋ និងផលដំណាំស្ថិតក្នុងសង្កាត់ព្រែកប្រា និងព្រែកថ្មី។

លោកអភិបាលខណ្ឌសុំឲ្យបងប្អូនជាម្ចាស់ដីដែលមានក្បាលដីជាប់ប្រឡាយសូមសហការណ៍ចូលរួមពីមន្ត្រីជំនាញធ្វើយ៉ាងណាឲ្យដំណើការជីកប្រឡាយបានដោយជោគជ័យគ្មានការរាំងស្ទះ។

លោក គុយ គឹមហ៊ាង បានបញ្ជាក់ថាបើសិនជាយើងមានប្រឡាយបង្ហូទឹករួចរាល់ គឺតំបន់ដែល​ធ្លាប់​តែរងការលិចលង់នោះគឺលែងលិចលង់បន្តទៀតហើយ៕

អត្ថបទ៖នរា