បុរសម្នាក់ពុលសត្វល្អិតម្យ៉ាងរហូតខូចគ្រឿងក្នុងទាំងស្រុងជួយសង្គ្រោះលែងបាន

បុរសវ័យ៤២ឆ្នាំម្នាក់បានពុលសត្វល្អិតមួយប្រភេទរហូតមិនអាចស្រោចស្រង់ជីវិតបាន ដោយសារគ្រឿងក្នុងសំខាន់ៗរបស់គាត់ត្រូវបានជាតិពុលបំផ្លាញអស់ទាំងស្រុង ក្រោយពីបរិភោគសត្វល្អិតម្យ៉ាង ដែលត្រូវបានគេស្គាល់ថា ខ្ញុងខ្មៅក្រហម ។

យោងតាមរបាយការណ៍របស់មន្ទីរព័ត៌មានខេត្តកំពង់ធំ បានឲ្យដឹងថា បុរសដែលពុលសត្វល្អិតនោះឈ្មោះ ឈន ឈឿន ភេទប្រុស អាយុ៤២ឆ្នាំ មុខរបរធ្វើស្រែចម្ការ បានបាត់បង់ជីវិត ដោយសារពុលអាហារ ក្រោយពីបរិភោគសត្វល្អិតម្យ៉ាងដែលត្រូវបានគេស្គាល់ថា ខ្ញុងខ្មៅក្រហម ។

ហេតុការណ៍នេះបានកើតឡើងនៅព្រឹកថ្ងៃទី២៩ ខែកក្កដា ឆ្នាំ២០២២ កន្លងទៅនេះ ស្ថិតនៅភូមិអូរខ្សង់​ ឃុំសាគ្រាម​ ស្រុកប្រាសាទបល្ល័ង្ក ខេត្តកំពង់ធំ ។ បើតាមការរៀបរាប់ពីក្រុមសាច់ញាតិបានឲ្យដឹងថា ដំបូងឡើយបុរសខាងលើ ត្រូវជាកូនបានឃើញគេដាក់លក់សត្វនេះដោយគិតថា មិនអី គាត់ក៏បានទិញវាយកមកលាងទឹក រួចក៏ចម្អិនហូបក្រោយលីងវាឆ្អិន។

ស្ត្រីជាម្តាយបានសាកល្បងហូបចូលមាត់បន្តិចក៏ខ្ជាក់ចេញវិញដោយស្រែកថា ល្វីងណាស់ ចំណែកបុរសជាកូនប្រុសបានបន្តហូបសត្វនេះធម្មតា។ បន្ទាប់ពីហូបសត្វនេះរួចបុរសខាងលើបានចាប់ផ្តើមមានអាការៈមិនស្រួលខ្លួន រាគផង ក្អួតផង ដោយគិតស្មានថា មិនអី រូបគាត់មិនបានទៅព្យាបាលនៅមន្ទីរពេទ្យទាន់ពេលនោះទេ ពោលគឺបន្តប្រើថ្នាំព្យាបាលនៅផ្ទះអស់រយៈពេលប្រហែលពីរថ្ងៃ។

ក្រោយមកសភាពជំងឺហាក់មិនថយសោះដោយវាកាន់តែធ្ងន់ធ្ងរទៅ ឃើញដូច្នេះសាច់ញាតិក៏សម្រេចដឹករូបគាត់ទៅកាន់មន្ទីរពេទ្យ ប៉ុន្តែពេលទៅដល់មន្ទីរពេទ្យ គ្រូពេទ្យបានប្រាប់វិញថា ហួសពេលហើយ គ្រឿងក្នុងសំខាន់ៗរបស់គាត់ត្រូវបានជាតិពុលបំផ្លាញអស់ហើយ ។

ឮដូច្នេះក្រុមសាច់ញាតិ ក៏បានសម្រេចដឹកបញ្ជូនគាត់មកផ្ទះទាំងសោកស្តាយទៅធ្វើបុណ្យតាមប្រពៃណីព្រះពុទ្ធសាសនា នៅរសៀលថ្ងៃទី០១ ខែសីហាឆ្នាំ២០២២។

គួរបញ្ជាក់ថា បើតាមអ្នកស្រុក សត្វល្អិតប្រភេទនេះមានឈ្មោះវាថា ខ្ញុងខ្មៅក្រហម ឬ ពព្លះខ្មៅក្រហម ។ សត្វល្អិត​​ប្រភេទនេះ វាមានរូបរាងតូចទម្ងន់ប្រហែល៤ ទៅ ៦ក្រាម​ ។ វាស្ថិតនៅក្នុងចំណោមសត្វល្អិត ដែលមិនអាចយកមកបរិភោគបានទេ បើទោះបីជាបានចម្អិនរួចហើយក៏ដោយ ។ មនុស្ស​ ឬសត្វ បរិភោគសត្វល្អិតប្រភេទនេះ នឹងត្រូវទទួលរងការខូច​ខាត​ធ្ងន់ធ្ងរ​ដល់​គ្រឿងក្នុងសំខាន់ដូចជា ក្រពះពោះវៀន, ក្រលៀន និងផ្លូវ​បង្ហួរនោម ព្រោះដោយសារសត្វល្អិតនេះ វាមានផ្ទុកកំហាប់ដ៏ច្រើននៃសារធាតុ ដែលជាជាតិពុលច្រើន៕