សន្តិសុខសង្គម
ល្បែងមាន់ជល់អនឡាញ កំពុងរីកដូចផ្សិតនៅស្រុកកៀនស្វាយ សមត្ថកិច្ចមិនមានវិធានការណ៍បង្ក្រាប
នៅតាមតូបកាហ្វេរាល់ថ្ងៃគេសង្កេតឃើញសកម្មភាពនៃការបើកល្បែងស៊ីសងតាមប្រព័ន្ធអនឡាញ ជល់មាន់ទូរទស្សន៍ កំពុងពេញនិយមខ្លាំងណាស់នៅក្នុងភូមិសាស្ត្រស្រុកកៀនស្វាយ ខេត្តកណ្ដាល ភ្នាល់ចាក់លុយធំៗ ដោយស្រែកហ៊ោកញ្ច្រៀវអ៊ូអរយ៉ាងគគ្រឹកគគ្រេងបំផុត ហាក់បីដូចជាល្បែងស្របច្បាប់ទៅហើយ។ ប៉ុន្តែផ្ទុយទៅវិញអាជ្ញាធរមូលដ្ឋានបានត្រឹមធ្វើកិច្ចសន្យាឱ្យឈប់ លុះសមត្ថកិច្ចចេញផុត បើកលេងវិញលើសដើម សកម្មភាពនេះ«ហាក់បីដូចជា ម្ចាស់ទីតាំងនិងសមត្ថកិច្ច កំពុងលេងបិទពួន ដើម្បីបន្លំភ្នែកមហាជន»។

ទីតាំងទី១៖ ត្រង់ចំណុចហាងកាហ្វេ”ផ្ទះតាជួន-យាយសំ”ខាងជើងវត្តគគីរធំ(ហៅវត្តចាស់)ប្រហែលជាង១០ម៉ែត្រ ស្ថិតនៅភូមិពោធិ៍មៀវ ឃុំគគីរធំ ស្រុកកៀនស្វាយ មានបង្កប់លេងបៀរទៀតផង។ ២៖ ហាងកាហ្វេក្បែរ”ផ្ទះតារឿនចុងភៅ”ស្ថិតនៅភូមិគគីរធំ ឃុំគគីរធំ ស្រុកកៀនស្វាយ។ ៣៖ ហាងកាហ្វេមុខ”ផ្ទះតាលឺ”ជនជាតិវៀតណាម កែងដើមជ្រៃ ស្ថិតនៅភូមិគគីរធំ ឃុំគគីរធំ ស្រុកកៀនស្វាយ។ ៤៖ ផ្ទះលក់កាហ្វេ ជនជាតិវៀតណាម ក្រោយរោងចក្រ សួនឧស្សាហកម្មសំរោងធំ ស្ថិតនៅភូមិព្រែកត្រែង២ ឃុំសំរោងធំ ស្រុកកៀនស្វាយ មានបង្កប់ល្បែងស៊ីសងបៀរនិងអាប៉ោង។ ៥៖ ចំណុចតារាងបាល់ទះ ខាងក្រោយសាលាឃុំសំរោងធំ ស្ថិតនៅភូមិជ្រោយដង ឃុំសំរោងធំ ស្រុកកៀនស្វាយ មានបង្កប់បៀរនិងអាប៉ោង។ ៦៖ ត្រង់ចំណុចកែងផ្លូវលំដើមត្នោត (ចុះទៅដីអតីតឡោកហួរ)តាមបណ្ដោយផ្លូវជាតិលេខ១ ស្ថិតនៅភូមិព្រែកតាកែវ ឃុំសំរោងធំ ស្រុកកៀនស្វាយ។ ៧៖ ត្រង់ចំណុចផ្ទះលក់កាហ្វេ ភូមិព្រែកតាកែវ២ ឃុំសំរោងធំ ស្រុកកៀនស្វាយ។ ៨៖ ត្រង់ចំណុចផ្ទះលក់កាហ្វេ ជនជាតិវៀតណាម ក្បែរ”កំពង់ដ ផ្លូវត្រី”ចំនួន២ទីតាំងទល់មុខគ្នា ស្ថិតនៅភូមិស្តៅកន្លែង២ ឃុំដីឥដ្ឋ ស្រុកកៀនស្វាយ មានបង្កប់បៀរនិងអាប៉ោងផងដែរ។

នេះគ្រាន់តែជាទីតាំងទ្រួសៗ ដែលប្រភពព័ត៌មានលួចផ្តល់អោយតែបុណ្ណោះ ។ កត្តានៃការបើកល្បែង”អនឡាញ”បែបនេះហើយ បណ្ដាលឱ្យស្ដ្រីខ្លះដែលមានប្ដីជាអ្នកញៀនល្បែង កើតចិត្តក្ដៅក្រហាយ ឈ្លោះប្រកែកគ្នាជាមួយប្ដីញឹកញាប់។ ខណៈប្ដីទៅហូបកាហ្វេ១កែវសោះ បែរជាមិនមកផ្ទះ តាំងពីព្រឹកដល់ល្ងាច ព្រោះរវល់នឹងការផ្សងសំណាង។ ភ្នាល់ចាក់លុយមាន់ជល់តាមទូរទស្សន៍បណ្ដាលឱ្យខាតពេល មិនបានទៅធ្វើការងាររកស៊ី ដើម្បីយកប្រាក់មកផ្គត់ផ្គង់គ្រួសារ។ ជាមួយគ្នានោះ អ្នកឈ្នះសប្បាយហ៊ោកញ្ច្រៀវឡើងទ្រហឹងអឺងកង ពេញហាងកាហ្វេ។ រីឯអ្នកចាញ់វិញ ប្រែទឹកមុខក្រៀមក្រំប្រឈមជំពាក់គេនិងត្រូវដោះបំណុលទៀតផង ។ អ្នកខ្លះភ្នាល់ចាញ់ផ្ទួនៗជាច្រើនថ្ងៃជាប់គ្នា កើតអារម្មណ៍មួម៉ៅមកផ្ទះវិញ ឈ្លោះប្រកែកប្រពន្ធកូន និងប្រើអំពើហិង្សាក្នុងគ្រួសារក៍មាន ព្រោះថា អ្នកលេងល្បែងពេលឈ្នះមុខខ្លាញ់ ពេលចាញ់មុខខ្លា បើចាញ់ច្រើនកាលណា អ្វីៗក៏ហ៊ានធ្វើអាចកើតជាអំពើចោរលួច ចោរប្លន់ និងអំពើអសន្តិសុខក្នុងមូលដ្ឋានជាដើម។ល។

ជុំវិញបញ្ហារនេះដែរ ភ្នាក់ងារសារព័ត៌មាន កម្ពុជាថ្មី ទំនាក់ទំនងទៅលោកវរសេនីយ៍ឯក ព្រុំ សំណាង អធិការនគរបាលស្រុកកៀនស្វាយ តែទូរសព្ឌ័ចូលគ្មានអ្នកទទួល ។ ដោយឡែកពលរដ្ឋសូមស្នើដល់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល ជាពិសេសលោក គង់ សោភ័ណ្ឌ អភិបាលខេត្តកណ្តាល មេត្តាអន្តរាគមន៍ចាត់កម្លាំងជំនាញចុះបង្ក្រាបទីតាំងល្បែងស៊ីសងតាមប្រព័ន្ធអនឡាញ ក្នុងភូមិសាស្ត្រស្រុកកៀនស្វាយ ដោយក្ដីអនុគ្រោះ ដើម្បីអនុវត្តឲ្យបាននូវគោលនយោបាយភូមិ-ឃុំ មានសុវត្ថិភាព៕
អត្ថបទ៖ ឆៃ យ៉ា




-
ព័ត៌មានអន្ដរជាតិ១៤ ម៉ោង ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម២ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៤ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ១ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៤ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
កីឡា១ សប្តាហ៍ ago
កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី
-
ព័ត៌មានអន្ដរជាតិ៥ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
ព័ត៌មានអន្ដរជាតិ៣ ថ្ងៃ ago
តើជោគវាសនារបស់នាយករដ្ឋមន្ត្រីថៃ «ផែថងថាន» នឹងទៅជាយ៉ាងណាក្នុងការបោះឆ្នោតដកសេចក្តីទុកចិត្តនៅថ្ងៃនេះ?