សមត្ថកិច្ច ២ ស្រុក បង្រ្កាបករណីប្រើប្រាស់ឧបករណ៍ឆក់ត្រី ឃាត់អ្នកប្រព្រឹត្តិ ៩ នាក់

សមត្ថកិច្ចនគរបាលស្រុកចំនួន ២ បង្រ្កាបករណី ប្រើប្រាស់ឧបករណ៍ឆក់ត្រីបានចំនួន ២ ករណី ឃាត់អ្នកប្រព្រឹត្តិចំនួន ៩ នាក់ និងដកហូតឧបករណ៍ឆក់បានចំនួន នៅយប់ថ្ងៃទី ២៥ ខែសីហា ឆ្នាំ ២០២២។

អនុវត្តតាមយោបល់ដឹកនាំជាប្រចាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋានគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី ចេង ឡេង ស្នងការរងផែនការងារនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាន សមត្ថកិច្ចនគរបាលស្រុកចំនួន ២ គឺស្រុកបាណន់ ដែលមានលោវរសេនីយ៍ឯក ប៉ាន់ វ៉ាន់នី ជាអធិការនគរបាលស្រុក និងស្រុកបវេល ដែលមានលោកវរសេនីយ៍ឯក សុខ សារិន ជា អធិការនគរបាលស្រុក បានដឹកនាំកម្លាំងក្នុងអង្គភាពឆ្មក់បង្រ្កាបក្រុមអ្នកប្រើប្រាស់ឧបករណ៍នេសាទខុសច្បាប់ (ឧបករណ៍ឆក់ត្រី) នៅក្នុងភូមិសាស្រ្តរបស់ខ្លួនបានចំនួន ២ ករណី។

ក្នុងនោះមានមនុស្សចំនួន៩ នាក់ ដែលត្រូវសមត្ថកិច្ចនគរបាល នាំមកធ្វើការសាកសួរស្រាវជ្រាវនៅអធិការដ្ឋាននគរបាលស្រុក និងបានធ្វើការដកហូតឧបករណ៍ឆក់ត្រីនេះមួយចំនួន។

នៅចំពោះមុខសមត្ថកិច្ចនគរបាល អ្នកប្រើប្រាស់ឧបករណ៍ឆក់ត្រីទាំង ៩ នាក់បានឆ្លើយសារភាព អំពីគោលបំណង និងសកម្មភាពរបស់ខ្លួននាពេលកន្លងទៅ ចំពោះការប្រើប្រាស់ឧបករណ៍នេសាទដោយខុសច្បាប់នេះ (ប្រើប្រាស់ឧបករណ៍ឆក់)។ ក្រោយពេលសារភាពកំហុស សមត្ថកិច្ចនគរបាលបានឱ្យសាមីខ្លួនអ្នកប្រព្រឹត្តិធ្វើកិច្ចសន្យាបញ្ឈប់សកម្មភាពល្មើសបែបនេះបន្តទៀត និងបានធ្វើការដកហូតឧបករណ៍ឆក់ត្រីដោយរក្សាទុកនៅអធិការដ្ឋាននគរបាលស្រុក ហើយឱ្យក្រុមគ្រួសារមកធានាយកទៅធ្វើការអប់រំបន្ថែមនៅមូលដ្ឋាន ដោយមិនឱ្យពួកគាត់បន្តសកម្មភាពនេះបន្តទៀត៕

(រូបភាព៖ នគរបាលស្រុកបាណន់ និងស្រុកបវេល)