មន្ត្រីខណ្ឌ​រដ្ឋបាលជលផលបង្ក្រាប​បទល្មើស​នេសាទ​ក្នុងភូមិសាស្ត្រ​ឃុំពាមជីកង ​ស្រុក​កងមាស

មន្ត្រីខណ្ឌរដ្ឋបាលជលផលខេត្តកំពង់ចាមបានសហការជាមួយអាជ្ញាធរស្រុកកងមាស និងកងកម្លាំងសមត្ថកិច្ចនគរបាលស្រុកកងមាស បង្ក្រាបបទល្មើសនេសាទក្នុងភូមិសាស្ត្រឃុំពាមជីកង ស្រុកកងមាស ខេត្តកំពង់ចាម។

លោក អ៊ុក ណារិន នាយខណ្ឌជលផលកំពង់ចាមបានប្រាប់ឲ្យដឹងថា ក្រោយពីមានសេចក្តីរាយការណ៍របស់ពលរដ្ឋថានៅចំណុចកោះតូច ឃុំពាមជីកង ជាប់ស្រុកស្រីសន្ធរ និងតបតាមការអនុញ្ញាតពីលោក ហាក់ ហ៊ាន់ ព្រះរាជអាជ្ញារងនៃអយ្យាកាអមសាលាដំបូងខេត្តកំពង់ចាមបានចាត់មន្ត្រីខណ្ឌរដ្ឋបាលជលផល សហការជាមួយនគរបាលស្រុកកងមាស ចុះបង្ក្រាបបទល្មើសជលផល ដែលមានស្បៃមុងរាប់រយម៉ែត្រ និងឧបករណ៍ខុសច្បាប់មួយចំនួន។

ក្នុងប្រតិបត្តិការបង្ក្រាបនេះធ្វេីឡេីងនៅព្រឹកថ្ងៃទី ៣ ខែកញ្ញា ឆ្នាំ ២០២២ កងកម្លាំងសមត្ថកិច្ចបានចុះបង្ក្រាបបីករណីរួមមាន៖ ករណីទី០១ រកឃេីញឧបករណ៍រ៉ាវចំនួន ០២មាត់ របាំងរ៉ាវប្រវែង ៣៥០ម៉ែត្រ បង្គោលចម្រឹងចំនួន ១៧៥ដើម និងចាក់លែងត្រីចម្រុះទម្ងន់ ០២គីឡូក្រាម។

ចំពោះករណីទី០២ រកឃេីញឧបករណ៍លូស្បៃមុងចំនួន ១២មាត់ របាំងស្បៃមុងប្រវែង ៣៦០ម៉ែត្រ បង្គោលចម្រឹងចំនួន ១៨០ដើម ចាក់លែងត្រីចម្រុះចំនួន ២៤គីឡូក្រាម នៅចំណុចកោះមុខពាមជីកង ឃុំពាមជីកង ស្រុកកងមាស ខេត្តកំពង់ចាម។ ហេីយចំពោះករណីទី០៣រកឃេីញឧបករណ៍លូស្បៃមុងចំនួន ០៨មាត់ របាំងស្បៃមុងប្រវែង ២៤០ម៉ែត្រ បង្គោលចម្រឹងចំនួន ១២០ដើម និងចាក់លែងត្រីចម្រុះចំនួន ១៦គីឡូក្រាម នៅចំណុចកោះតូច ឃុំអង្គរបាន ស្រុកកមាស ខេត្តកំពង់ចាម។

ក្រោយពីបង្ក្រាបរួចកងកម្លាំងជំនាញបានកសាងសំណុំរឿងតាមនិតិវិធីនៃច្បាប់ស្តីពីជលផល និងរុះរើបំផ្លាញចោលវត្ថុតាងនៃបទល្មើសជលផលនៅនឹងកន្លែងតែម្តង៕

អត្ថបទ៖ ឡេក ចាន់ពេជ្រ