ពលរដ្ឋរស់នៅសង្កាត់កាកាបទី២​ ស្នើអាជ្ញាធរខណ្ឌពោធិ៍សែនជ័យ​ពិនិត្យជួសជុល​កំណាត់ផ្លូវមួយ​ខ្សែកំពុងខូចខាតខ្លាំង

កំណាត់ផ្លូវមួយខ្សែនៅក្នុងភូមិព្រៃសាលាសង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ត្រូវបានកាត់ផ្តាច់ចរាចរណ៍ទាំងស្រុងធ្វើដំណើរឆ្លងកាត់លែងរួចហើយ បងប្អូនប្រជាពលរដ្ឋសូមសំណូមពរអាជ្ញាធរខណ្ឌពោធិ៍សែនជ័យ ជួយដោះស្រាយអន្តរាគមន៍ ជួសជុលស្ថាបនាឱ្យបានល្អប្រសើរសម្រាប់ការធ្វើដំណើរបានស្រួល។

ផ្លូវនេះមានប្រវែងប្រមាណជាង ២០០ម៉ែត្រ មានសារៈសំខាន់ណាស់សម្រាប់រំដោះចរាចរណ៍ ផ្លូវបេតុង ស្របតាមផ្លូវរថភ្លើងមកផ្លូវបេតុងនៅក្នុងភូមិឆ្ពោះព្រៃទា។

បន្ទាប់ពីបុរីដ៍ធំមួយចាប់ផ្តើមដំណើរការនៅខាងត្បូងកំណាត់ផ្លូវនេះបានទ្រុឌទ្រោមដោយទ្រាំនិងរថយន្តដឹកដី និងរថយន្តក្រឡុកស៊ីម៉ង់តិ៍រាប់សិបគ្រឿងជារៀងរាល់ថ្ងៃមិនបានក៏រងការខូចខាតធ្ងន់ធ្ងរ។ ទន្ទឹមនោះអាជ្ញាធរខណ្ឌពោធិ៍សែនជ័យ ហាក់ដូចជាពុំបានយកចិត្តទុកដាក់មើលផ្លូវឡើយទុកឱ្យប្រជាពលរដ្ឋធ្វើដំណើរឆ្លងកាត់យ៉ាងវេទនា។

តាមប្រជាពលរដ្ឋរស់នៅតំបន់នោះបានអោយដឹងទៀតថា រយៈពេលប្រមាណជាង១ខែមកហើយ ដែលកំណាត់ផ្លូវនេះ រងការខូចខាតធ្ងន់ធ្ងរមានជង្ហុកធំៗ និងមានទឹកដក់ពេលភ្លៀងស្ទើរក្លាយជាកូនអូរទៅហើយជាហេតុធ្វើឱ្យប្រជាពលរដ្ឋ ដែលធ្វើដំណើរតាមម៉ូតូ និងរថយន្តតូចៗធ្វើដំណើរលែងរួច។ចំណែករថយន្តធំៗ មួយចំនួន ក៍បានជាប់ផុងផងដែរ។

ជាក់ស្តែងកាលពីថ្ងៃទី៧ ខែ កញ្ញា ឆ្នាំ២០២២ រថយន្តឃ្លុបដឹកទំនិញមួយគ្រឿងបានជាប់ផុងទៅមុខលែងរួចអស់មួយព្រឹក ហើយត្រូវបានម្ចាស់ហៅរថយន្ត មកអូសចេញ។

ប្រជាពលរដ្ឋក៍បានសំណូមពរដល់រដ្ឋបាលរាជធានីភ្នំពេញក៍ដូចជារដ្ឋបាលខណ្ឌពោធិ៍សែនជ័យមេត្តាជួយមើលផ្លូវ និងជួសជុលផងដើម្បីអោយកំណាត់ផ្លូវដ៍មានសារះសំខាន់នេះចរាចរណ៍ឡើងវិញ៕

អត្ថបទ៖ រ៉ាវុទ្ធ