គណៈបញ្ជាការឯកភាពរដ្ឋបាលខេត្តកំពង់ឆ្នាំង​ដាក់ផែនការបង្ក្រាប​បទល្មើសល្បែងស៊ីសង

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងជាប្រធានគណៈបញ្ជាការឯកភាពរដ្ឋបាល​ខេត្តនៅព្រឹកថ្ងៃទី ១៩ ខែកញ្ញា ឆ្នាំ២០២២ បានដឹកនាំការប្រជុំដាក់វិធានការម៉ឺងម៉ាត់ដល់លោកអភិបាលក្រុង​ស្រុកជាពិសេសមេប៉ុស្តិ៍រដ្ឋបាល និងមេឃុំ ជាអ្នកគ្រប់គ្រងផ្ទាល់នៅមូលដ្ឋាន ត្រូវតែបិទល្បែង​ស៊ីសងគ្រប់ប្រភេទពិសេសឡូតូ កន្ទុយលេខ និងអនឡាញជល់មាន់ជាបន្ទាន់តាមបទបញ្ជារបស់​ប្រមុខរាជរដ្ឋាភិបាល។ ក្នុងនោះចំពោះអ្នកមានច្បាប់ត្រូវធ្វើពាក្យស្នើសុំឡើងវិញដើម្បីរដ្ឋបាល​ខេត្តពិនិត្យ និងគ្រប់ជាក់ស្ដែង។

នៅក្នុងកិច្ចប្រជុំនេះមានការចូលរួមពីមេឃុំ ចៅសង្កាត់ មេប៉ុស្តិ៍រដ្ឋបាលអធិការក្រុង ស្រុក អភិបាលក្រុងស្រុក និងមន្ទីរអង្គភាពជុំវិញខេត្តផងដែរសរុបមានចំនួនជាង៣០០ នាក់។

​លោកអភិបាលខេត្តកំពង់ឆ្នាំងបានបន្តថា ចំពោះការបង្ក្រាបល្បែងស៊ីសង​នេះបើធ្វើមិន​បាន​នោះ​មេប៉ុស្តិ៍មេឃុំត្រូវទទួលខុសត្រូវជាមួយស្រុកក្រុងហើយស្រុកត្រូវទទួលខុសត្រូវជា មួយខេត្ត និង​ស្នង​ការខេត្ត។ ចំណែកខេត្ត និងត្រូវទទួលខុសត្រូវចំពោះមុខនាយករដ្ឋមន្ត្រី។

ការអនុវត្តគោលនយោបាយភូមិឃុំមានសុវត្ថិភាព អភិបាលក្រុងស្រុកត្រូវពង្រឹងប៉ុស្តិ៍រដ្ឋបាល មេឃុំ និងប្រជាការពារ និងមេភូមិត្រូវមានប៉ុស្តិ៍ប្រចាំការ២៤ម៉ោងនៅតាមគោលដៅដោយរៀបចំទំនាក់​ទំនងគ្នាតាមវិទ្យុទាក់ទងគ្រប់មូលដ្ឋាន ដើម្បីក្តាប់សភាពការណ៍ និងសហការគ្នាបង្ក្រាបបទល្មើស​ឲ្យបានទាន់ពេលវេលាចំពោះអ្នកមានស្នាដៃបង្ក្រាបបទល្មើសធំៗរដ្ឋបាលខេត្ត និងផ្ដល់រង្វាន់ជូន។

​ចំពោះការអភិវឌ្ឍភូមិឃុំ អភិបាល ក្រុងស្រុកត្រូវជំរុញឲ្យមេភូមិធ្វើផែនទីនៅតាមភូមិក្នុងមួយអាទិត្យ​ទៀតត្រូវមានលទ្ធផលរាយការណ៍មកខេត្ត។ ហើយត្រូវធ្វើសួនច្បារនៅតាមសាលាឃុំ និងសាលាស្រុកឱ្យបានតាមការណែនាំកន្លងមក៕

អត្ថបទ៖ ឈៀងថារិទ្ធ