​ពលរដ្ឋត្អូញត្អែរពីតម្លៃសំបុត្រឡានក្រុង​នៅតែឡើងថ្លៃ​នាឱកាសបុណ្យភ្ជុំ​

​ប្រជាពលរដ្ឋសិស្ស និស្សិតមួយចំនួនដែលធ្វើដំណើរទៅលេងស្រុកកំណើត​នាឱកាស​បុណ្យ​ភ្ជុំ​បិណ្ឌ​នេះ ​នៅតែត្អូញត្អែរ​ពីការតម្លើថ្លៃសំបុត្ររថយន្តក្រុង​ បើទោះបីរាជរដ្ឋាភិបាល​សុំការ​យោគ​យល់​កុំឱ្យ​ក្រុម​ហ៊ុនដឹកអ្នកដំណើរ​តម្លើងថ្លៃសំបុត្រក្នុងឱកាសបុណ្យភ្ជុំបិណ្ឌនេះក៏ដោយ។

​អ្នកដំណើរពីរនាក់​ជានិស្សិត​សុំមិនបញ្ចេញឈ្មោះបានចេញទៅលេងស្រុកកំណើត​ថ្ងៃនេះ​នៅឯខេត្ត​ឧត្តរ​មាន​ជ័យដោយ​បានទិញ​សំបុត្រក្រុមហ៊ុន ដឹកជញ្ជូន ឬទ្ធិ មុនី ​ត្អូញត្អែរថា តម្លៃសំបុត្រ​រថយន្ត​ក្រុងនៅថ្ងៃទី ២២ ខែកញ្ញានេះ ​ឡើងរហូតដល់ ៧ ៥០០០ រៀល ដែលអ្នកទាំងពីរគិតថា ជាតម្លៃ​ឡើង​ថ្លៃ​ហួស​ហេតុ​ក្នុង​ពេល​បុណ្យទាន ខណៈថ្ងៃធម្មតាត្រឹមតែ ៤ ម៉ឺន ទៅ ៥ ម៉ឺនរៀលប៉ុណ្ណោះ។

កម្ពុជាថ្មីបានព្យាយាមទាក់ទងសុំការបញ្ជាក់អំពីការតម្លើងថ្លៃសំបុត្ររបស់ក្រុមហ៊ុនដឹកជញ្ជូន ឬទ្ធិ មុនី ប៉ុន្តែទូរស័ព្ទចូល មិនមានអ្នកទទួល។

ចំណែកក្រុមហ៊ុនមួយទៀត គឺក្រុមហ៊ុន បូព៌ា អាស៊ីដឹកអ្នកដំណើរ​ក៏ត្រូវអ្នកដំណើរបញ្ជាក់ថាបានឡើងថ្លៃស្ទើរតែគុណនឹងពីរគឺតម្លៃ ៦ ០០០ រៀលពីភ្នំពេញ-អន្លុងវែង ខណៈដែលអ្នកដំណើររូបនេះអះអាងថា ខ្លួនធ្លាប់ជិះត្រឹមតែតម្លៃ ៣ ៥០០០ រៀល​ប៉ុណ្ណោះចំពោះថ្ងៃធម្មតា៕

អត្ថបទ៖ ឡេង ដេត