សន្តិសុខសង្គម

ឃុំចំនួន៥ ក្នុងចំណោមឃុំទាំង៧ របស់ស្រុកអង្គរជុំ កំពុងរងគ្រោះដោយសារជំនន់ទឹកភ្លៀង

បានផុស

២ years មុន

នៅ

ថ្ងៃព្រហស្បតិ៍ ២២ កញ្ញា ២០២២

ដោយ

សៀមរាប ៖ នៅល្ងាចក្នុងថ្ងៃទី២២ ខែកញ្ញា ឆ្នាំ២០២២នេះ លោក លុក ផុស អភិបាលស្រុកអង្គរជុំ បានប្រាប់កម្ពុជាថ្មីយើងឲ្យដឹងថា ដោយសារតែមានភ្លៀងធ្លាក់ជាបន្តបន្ទាប់ ចាប់ពីថ្ងៃទី២០មកដល់ថ្ងៃទី២២ ខែកញ្ញា ឆ្នាំ២០២២ និងមួយផ្នែកទៀតទទួលទឹកជំនន់មកពីភូមិសាស្ត្រស្រុកវ៉ារិនផងនោះ បណ្តាលឱ្យកើតមានទឹកជំនន់នៅភូមិសាស្ត្រក្នុងឃុំចំនួន៥ ក្នុងចំណោមឃុំទាំង៧របស់ស្រុកអង្គរជុំ រួមមាន ៖ ឃុំស្រែខ្វាវ , ឃុំចារឈូក , ឃុំនគរភាស , ឃុំតាសោម និង ឃុំគោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលស្រុកបន្តថា ផលប៉ះពាល់ដោយសារជំនន់ទឹកភ្លៀងនៅក្នុងឃុំទាំង៥នោះរួមមាន ៖ ១. ឃុំ ស្រែខ្វាវទឹកហូររំលងផ្លូវសរុបចំនួន ០៥ ខ្សែ មានប្រវែងសរុប ៥,៦០០ ម៉ែត្រ , ២ ឃុំចារឈូក ទឹកលិចក្រោមផ្ទះប្រជាពលរដ្ឋសរុបនៅភូមិ ចំនួន ០៥ ស្មើនឹង២២៥គ្រួសារ ទឹកហូររំលងផ្លូវសរុបចំនួន ០៩ ខ្សែ មានប្រវែងសរុប ១៣.៨៥០ម៉ែត្រ ដាច់ផ្លូវសរុប ២ កន្លែង ប្រវែង ៥០ម៉ែត្រ ទឹកហូរច្រោះផ្ទះធ្ងន់ធ្ងរខ្លាំង ១ខ្នង ទឹកលិចទីធ្លាសាលារៀនចំនួន ៣សាលា ទឹកលិចទីធ្លាវត្តចំនួន ១វត្ត និង ទឹកលិចទីធ្លាមន្ទីរពេទ្យបង្អែក , ៣.ឃុំនគរភាស ទឹកលិចក្រោមផ្ទះប្រជាពលរដ្ឋសរុបចំនួន ០៨ ភូមិស្មើនឹង ៩៨ គ្រួសារ ទឹកហូររំលងផ្លូវចំនួន ០៤ខ្សែ ប្រវែង ១.៥៩៥ ម៉ែត្រ ដាច់ផ្លូវ១កន្លែង ប្រវែង ១៥ ម៉ែត្រ ទឹកហូរច្រោះផ្លូវ១កន្លែងទឹកលិចទីធ្លាសាលារៀនចំនួន១សាលា ទឹកលិចទីធ្លាមណ្ឌលសុខភាពនគរភាស១កន្លែង និង ទឹកលិចប៉ុស្ដិ៍នគរបាលរដ្ឋបាលនគរភាស ១កន្លែង , ៤.ឃុំតាសោម ទឹកលិចក្រោមផ្ទះប្រជាពលរដ្ឋសរុបចំនួន១២ ភូមិ ស្មើនឹង ១៨៧ គ្រួសារ ទឹកហូររំលងផ្លូវចំនួន ១៨ខ្សែ មានប្រវែងសរុប ៨.៩១០ម៉ែត្រ និង ទឹកលិចទីធ្លាសាលារៀនចំនួន ៥សាលា និង ៥.ឃុំគោល ទឹកលិចក្រោមផ្ទះប្រជាពលរដ្ឋសរុបចំនួន ៧ភូមិ ស្មើនឹង ១០២ គ្រួសារ ទឹកហូររំលងផ្លូវសរុបចំនួន០៨ ខ្សែ មានប្រវែងសរុប៥.៩២០ ម៉ែត្រ ទឹកហូរដាច់ផ្លូវសរុប ៦កន្លែង មានប្រវែងសរុប ១៨៥ ម៉ែត្រ ទឹកហូរច្រោះលូ ៦កន្លែង ទឹកលិចទីធ្លាសាលាមត្តេយ្យសហគមន៍ភូមិអំពិលធ្នង់ចំនួន០១សាលា ទឹកលិចទីធ្លាវត្តប្រាសាទគោលរង្ស៉ី និង ទឹកលិចទីធ្លាមណ្ឌលសុខភាព គោល១កន្លែង។

លោកអភិបាលស្រុកអង្គរជុំ បន្តថា នៅក្នុងអំឡុងពេលនៃការកើតមានគ្រោះទឹកជំនន់នេះ នៅមិនទាន់មានប៉ះពាល់ដល់អាយុជីវិប្រជាពលរដ្ឋ និងសត្វ ឡើយ ខណៈបច្ចុប្បន្ននេះ អាជ្ញាធរស្រុក ឃុំ ភូមិ និង កងកម្លាំងមានសមត្ថកិច្ច កំពុងសហការគ្នាយ៉ាជិតស្និទ្ធ បន្តត្រៀមលក្ខណៈ ដើម្បីតាមដាន និងត្រៀមបម្រុងសម្រាប់ជួយសង្គ្រោះ ក្នុងករណីមានគ្រោះមហន្តរាយ ឬឧបទ្ទវហេតុផ្សេងៗ ព្រមទាំងបានធ្វើការណែនាំដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្ន មើលថែកូនចៅឲ្យបានល្អជៀសវាងគ្រោះថ្នាក់ដោយការលង់ទឹក , ការថែទាំសុខភាព ការបង្កាជំងឺរាករូស , កាពារពីការយាយីពីសត្វមានអាសិរពិស និង ការស្វែងរកទីទួលមានសុវត្ថិភាព ក្នុងករណីទឹកជំនន់នៅតែបន្តកើនឡើងខ្លាំងទៀត៕

ដោយ ៖ គឿនវេត