ចៅសង្កាត់ចាក់អង្រែក្រោម ចុះបង្ក្រាបទីតាំង​លួចបើកហ្គេមខុសច្បាប់ ឃាត់មនុស្ស ៦ នាក់

នៅវេលាម៉ោង១៦និង៥០នាទីរសៀល ថ្ងៃទី២៧ ខែកញ្ញា នេះ លោក ជា សុខៃ ចៅសង្កាត់ចាក់អង្រែក្រោម បានដឹកនាំកម្លាំងចុះបង្ក្រាបទីតាំងលួចបង្កប់ហ្គេមអុិនធឺណេតខុសច្បាប់ ដោយឃាត់ខ្លួនមនុស្ស៦នាក់ ក្នុងនោះមានស្រី២នាក់។

លោក ជា សុខៃ បានប្រាប់ថា ករណីបង្ក្រាបទីតាំងហ្គេមនេះ បានធ្វើឡើងនៅផ្ទះគ្មានលេខក្រុមទី៣៣ ភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ហើយខណៈដែលកម្លាំងចុះទៅដល់ទីតាំង គឺបានឃើញមនុស្ស៦នាក់កំពុងលេងហ្គេម និងបានឃាត់ខ្លួនដោយក្នុងនោះកម្លាំងចម្រុះរឹបអូសបានកុំព្យូទរ័លើតុចំនួន៥គ្រឿងម៉ូតូ២គ្រឿង ដោយរក្សារទុកនៅស្នាក់ការនគរបាលប៉ុស្តិ៍។

លោកចៅសង្កាត់បានបញ្ជាក់ថា ចំពោះមនុស្សទាំង៦នាក់ដែលឃាត់បានត្រូវបានធ្វើការអប់រំរួចឲ្យត្រឡប់ទៅផ្ទះវិញទាំងល្ងាចថ្ងៃដដែល។ អ្វីដែលហួសចិត្តនោះ គឺក្រុមមនុស្សទាំងនេះដូចជាមិនខ្លាចរអាចំពោះច្បាប់ប្រឆាំងនឹងល្បែងសុីសង​សោះ។ ប៉ុន្តែបើនៅមានបន្ត គឺនឹងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់ដោយពុំលើកលែងឡើយ៕

អត្ថបទ៖ នរា