មន្ទីរសាធារណការ​ខេត្តព្រះវិហារបិទកំណាត់ផ្លូវជាតិលេខ ៩២ មិនឲ្យធ្វើចរាចរណ៍ដោយសារទឹកជន់លិចផ្លូវ

មន្ទីរសារធារណការ ​និងដឹកជញ្ជូនខេត្តព្រះវិហារ​បានប្រកាសផ្អាកចរាចរណ៍​បណ្ដោះអាសន្ន​រថយន្តគ្រប់ប្រភេទ​លើកំណាត់ផ្លូវជាតិលេខ ៩២ ក្នុងភូមិសាស្ត្រស្រុកជាំក្សាន្ត ខេត្តព្រះវិហារ ដោយសារស្ថានភាពគ្រោះទឹកជំនន់ទឹកភ្លៀង​បានបន្តឡើងរហូតដល់កម្រិតប្រកាសអាសន្ន​មិនអាចធ្វើចរាចរណ៍បានចំពោះរថយន្តគ្រប់ប្រភេទ។

សេចក្ដីជូនដំណឹងរបស់មន្ទីរសារធារណការខេត្តព្រះវិហារចេញផ្សាយនៅថ្ងៃទី ៤ ខែតុលានេះបញ្ជាក់ថា «ដោយសារស្ថានភាពគ្រោះទឹកជំនន់ទឹកភ្លៀង​បានបន្តឡើងរហូតដល់កម្រិតប្រកាសអាសន្ន​មិនអាចធ្វើចរាចរណ៍បានចំពោះរថយន្តគ្រប់ប្រភេទ។ អាស្រ័យហេតុនេះ មន្ទីរសារធារណការ និងដឹកជញ្ជូនខេត្តព្រះវិហារសូមធ្វើការបិទចរាចរណ៍ទាំងស្រុងជាបណ្ដោះអាសន្នចំពោះរថយន្តគ្រប់ប្រភេទទាំងអស់នៅលើកំណាត់ផ្លូវជាតិលេខ ៩២ ស្ថិតក្នុងឃុំមរកត ស្រុកជាំក្សាន្ត ខេត្តព្រះវិហារ ដើម្បីថែរក្សាផ្លូវថ្នល់ ស្ពាន កុំឲ្យបាក់ស្រុត និងធានាសុវត្ថិភាពក្នុងការធ្វើចរាចរណ៍»៕