ជំនន់ស្ទឹងសង្កែ​កំពុងលិចផ្លូវ​ច្រើនកន្លែងក្នុងក្រុងបាត់ដំបង

​ចាប់តាំងពីយប់ថ្ងៃទី៤ ​រហូតមកទល់និងថ្ងៃទី៥ ខែតុលា ឆ្នាំ២០២២នេះ​ ទឹកក្នុងស្ទឹងសង្កែចាប់ផ្តើម​ស្ទុះឡើងយ៉ាងខ្លាំង និងលឿនជាទីបំផុតធ្វើឲ្យទឹកជន់ជោរប្រៀបមាត់ច្រាំងដែលបង្កឲ្យ​អ្នកដែលរស់​នៅតាមមាត់ស្ទឹង ចាំបាច់ត្រូវរើសម្ភារឡើង​មកទីទួលជាបណ្តោះអាសន្ន។

​នៅព្រឹកនេះដែរគេសង្គេតឃើញថា ក្នុងបរិវេណផ្សារបឹងឈូក ​និងផ្លូវជាច្រើនខ្សែ​កណ្តាលក្រុង​បាត់ដំបង ត្រូវបានទឹកស្ទឹងច្រាលតាមប្រព័ន្ធលូ ជន់លិចបង្កជាបញ្ហាក្នុងការធ្វើដំណើររបស់ប្រជាពលរដ្ឋ និងអ្នកដែលរស់នៅក្នុងតំបន់ទំនាបទាំងនេះ។

បើយោងតាមកម្រិតកម្ពស់ទឹកស្ទឹងកាលពីម្សិលមិញទឹកបានឡើងដល់កម្រិត ១៣ ម៉ែត្រហើយ នៅថ្ងៃទី៥ តុលានេះ ទឹកបានស្ទុះឡើងដល់ ១៣,៧០ ម៉ែត្រ ដែលជាកម្រិតមួយត្រូវប្រកាសអាសន្នហើយ សម្រាប់ប្រជាពលរដ្ឋដែលរស់នៅតាមបណ្តោយស្ទឹងសង្កែ ដែលត្រូវបង្កើននូវការប្រុងប្រយ័ត្នអោយបានខ្ពស់បំផុត ព្រោះកម្លាំងទឹកអាចនឹងហក់ឡើងបន្ថែមទៀតសម្រាប់ថ្ងៃស្អែក៕

អត្ថបទ៖សោ និយមរ័ត្ន