សន្តិសុខសង្គម

ឃាត់ខ្លួនជនសង្ស័យ ០៣ នាក់ ពាក់ព័ន្ធករណីលួចកាច់សោ.ក យកម៉ូតូរបស់ពលរដ្ឋ

បានផុស

២ years មុន

នៅ

ថ្ងៃសុក្រ ៧ តុលា ២០២២

ដោយ

កម្លាំងនគរបាលខេត្តសៀមរាប សហការគ្នាឃាត់ខ្លួនជនសង្ស័យចំនួន ០៣ នាក់ ពាក់ព័ន្ធករណីអំពើលួចកាច់សោ.ក ម៉ូតូរបស់ពលរដ្ឋ និងប្រើប្រាស់ដោយខុសច្បាប់នូវសារធាតុញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ទោ ដា ចំរើន អធិការនគរបាលក្រុងសៀមរាប បានឲ្យដឹងថា នៅថ្ងៃទី ០៤ ខែកញ្ញា ឆ្នាំ ២០២២ វេលាម៉ោង ០៣ និង ៤០ នាទីទៀបភ្លឺ មានជនសង្ស័យ ០២ នាក់ ជិះម៉ូតូម៉ាក Honda Dream C១២៥ ពណ៌ខ្មៅ ស៊េរីឆ្នាំ ២០២២ បានធ្វើសកម្មភាពលួចកាច់សោ.ក ម៉ូតូរបស់ជនរងគ្រោះឈ្មោះ យ.ស ភេទស្រី អាយុ ២៤ ឆ្នាំ មុខរបរបុគ្គលិក ផ្ទះសំណាក់យីហោ(ប.ថ) ម៉ាក Honda Dream C១២៥ ពណ៌ខ្មៅ ស៊េរីឆ្នាំ ២០២១ ពាក់ស្លាកលេខសៀមរាប 1AK-០៤០៨ លេខតួ+ម៉ាស៊ីន៦០០១៩៤១ ដែលចតទុកនៅក្នុងកន្លែងធ្វើការ ស្ថិតក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប រួចក៏ជិះម៉ូតូគេចខ្លួនបាត់។

លោកបន្តថា ក្រោយពីទទួលព័ត៌មានពីជនរងគ្រោះខាងលើ សមត្ថកិច្ច រួមទាំងកម្លាំងការិយាល័យព្រហ្មទណ្ឌកម្រិតស្រាល បានល្បាត ហើយប្រទះឃើញមុខសញ្ញា ក៏បានដេញតាមជនសង្ស័យទៅដល់ភូមិខ្វាវ ឃុំត្បែង ស្រុកបន្ទាយស្រី ខេត្តសៀមរាប និងសហការគ្នាជាមួយកម្លាំងនគរបាលស្រុកបន្ទាយស្រី ចុះឃាត់ខ្លួនជនសង្ស័យ ទី១.ឈ្មោះ វ៉ាន់ ធី ហៅវ៉ាន់ ថា ភេទប្រុស អាយុ ២៩ ឆ្នាំ មុខរបរមិនពិតប្រាកដ មានស្រុកកំណើតភូមិសំពៅមាស ឃុំសានគរ ស្រុកកំពង់ស្វាយ ខេត្តកំពង់ធំ ស្នាក់នៅភូមិចុងកៅស៊ូ សង្កាត់ស្លក្រាម ក្រុងសៀមរាប។ ទី២.ឈ្មោះ នួន ប៊ុនទេពីន ហៅពីន ភេទប្រុស អាយុ ២២ ឆ្នាំ មុខរបរមិនពិតប្រាកដ មានស្រុកកំណើត ឃុំអូរឫស្សី ស្រុកក្រចេះ ខេត្តក្រចេះស្នាក់នៅភូមិចុងកៅស៊ូ សង្កាត់ស្លក្រាម ក្រុងសៀមរាប រួមជាមួយវត្ថុតាង (ម៉ូតូជនរងគ្រោះ) រួចយកមកសួរនាំ។ ក្រោយពីសួរនាំ ជនសង្ស័យឈ្មោះ វ៉ាន់ ធី ហៅវ៉ាន់ថា បានឆ្លើយសារភាពថា ខ្លួនទើបតែចេញពីពន្ធនាគារ កាលពីថ្ងៃទី ២៩ ខែសីហា ឆ្នាំ ២០២២។ ខ្លួនពិតជាបានលួចកាច់សោយកម៉ូតូខាងលើជាមួយឈ្មោះ នួន ប៊ុនទេពីន ពិតមែន។

ចំពោះវត្ថុតាងដកហូតរួមមាន ៖ ម៉ូតូចំនួន ០២ គ្រឿង គឺទី១.ម៉ាកHonda dream c125 ពណ៌ខ្មៅ ស៊េរីឆ្នាំ ២០២១ ពុំមានស្លាកលេខ លេខតួ+ម៉ាស៊ីន ៦០០១៩១៤។ ទី២.ម៉ាកHonda dream c125 ពណ៌ខ្មៅ ស៊េរីឆ្នាំ ២០២២ ពុំមានស្លាកលេខ លេខតួ+ម៉ាស៊ីន ៦៣៥០៨៨០។ ទី៣.សោកែច្នៃ ១ គ្រាប់,ទី៤.ទូរស័ព្ទដៃ ០២ គ្រឿង។

សមត្ថកិច្ចបានធ្វើតេស្តរកសារធាតុញៀនលើខ្លួនជនសង្ស័យខាងលើទាំង ០៣ នាក់ ជាលទ្ធផលជនសង្ស័យឈ្មោះ នួន ប៊ុនទេពីន ភេទប្រុស( វិជ្ជមាន)។